MYC PERHKHUANG 2021 August 15 thleng video a thehluh theih dawn

Mizoram Youth Commission chuan zai hmanga intihsiakna, 'MYC PERHKHUANG 2021' a buatsaih dawn a. Mizo ṭhalai kum 14-35 inkar a duh apiang tan tel theih a ni ang.

Mizo, English leh Hindi hla i duh ber Guitar emaw Keyboard emaw hmanga i sakna video tawi (2 Minutes landscape video) i siam ang a, Hming, Veng leh District lang telin mycperhkhuang01@gmail.com emaw Telegram/WhatsApp -8258088641-ah emaw thehluh mai tur a ni ang. August 15 (Independence Day) thleng a thehlut theih dawn a ni.

Chung video lut hrang hrang aṭang chuan Mizoram District tin aṭangin zaithiam pathum (3) an thlang chhuak leh dawn a, District tin aṭanga thlan chhuahte chuan Virtual hmangin intihsiakna an nei leh ang.

Top 5 chin chu MYC lamin lawmman Rs Nuai 1 hu a pek dawn bakah thla ruk chhung contract (a aia rei pawh a ni thei) an ziahpui dawn a, ram chhung leh pawna an programme tur an ngaihtuah sak dawn bawk.

Mizoram Youth Commission chuan MYC PERHKHUANG 2021-ah hian kum 14-35 inkar a duh apiang lo tel turin a sawm a ni.

MYC PERHKHUANG thiltum
'MYC PERHKHUANG' show hi virtual show satliah mai a ni dawn lo a, he show kaltlang hian zaithiam mi panga tal chher chhuah hi MYC thil tum ber chu niin a buatsaihtu lam chuan an tarlang.

Chung zaithiam panga an thlan chhuahte chu ram chhung mai bakah ram pawn lam thlenga an platform tur an ngaihtuah zui dawn. Ṭhalaite tana Talent Promotion Platform ṭha tak tur a ni.

Judge turte chu
Zoram dung leh vanga zai thiam leh musician lar ṭhahin he intihsiakna hi an endik dawn a ni.

90's chhoa Mizo rock band lar ber zinga mi, vawiin thlenga Zofate'n an rimawi kan la ngainat Tribal Power vocalist OPa te, Magdalene leh Scavenger Project guitarist bakah tunlaia Mizo zinga podcaster lar ber pawl Victor Vanlalhruaia te, zaithiam Henry Varte te, The Chosen vocalist Fiona Pachuau te, Dr Luke vocalist ṭhin Feli Thangluah te leh zaithiam Isak Malsawmtluanga te chu endiktu turte an ni dawn.

Host leh Co-Host
MPL leh MSL vel hnehsawh taka lo host tawh ṭhintu Angelina VL Hriatpuii chu host a ni dawn a, Vanlalchhandami chu co-host a ni bawk ang.

Musician an ṭha dawn
Guitars - Jonah Ralte
Guitars - Zosangzuala Pachuau
Bass - Remsanga
Keys - Albert Peka
Keys, Sax, Violin - JC Lalrinpuia
Drums - Mike Ji