Mystical Mizoram Ṭhazual Gospel : Maruati 'Lo Kir Rawh' a mawi ber

Mystical Mizoram Ṭhazual Gospel-ah Maruati 'Lo kir rawh' chu pakhatna a ni a, The Prophets 'Siamtu Pathian' chu pahnihna ni thungin One In Christ 'Ka mit ngei hian a thlir ang' chu pathumna a ni.

Pakhatna leh Pangana Maruati
A hla sak apiang a sa mawi emaw tih mai tur khawpa zai thiam Maruati chuan a hla lungkuai tak leh ngaihthlak nuam tak 'Lo kir rawh' chu Ṭhazualah Gospel chart-ah pakhatna a ni.

He hla hi Vanromawia phuah niin Maruati hian May thla chawhnu lamah khan a tichhuak a, a hla thu a ṭhain Maruati hian a sa mawi bawk a, pakhatna a ni pawh hi a phu hle.

Maruati hian kuminah hla thar a tichhuak zeuh zeuh tawh a, a hit thei viau mai. Kar thum vel liam taa a tihchhuah 'Pathian Hmangaihna' album-a title hla 'Pathian Hmangaihna' chu pangana a rawn nihpui der tawh mai. He hla hi a ngaithlatute'n mawi an ti hle tih a chiang a, YouTube lamah phei chuan thlirtu nuai hnih dawn an awm der tawh.

Pahnihna The Prophets, Pathumna OiC
Mizo Gospel rock band ṭha ber zinga mi The Prophets hla mawi tak leh music video hmuhnawm tak 'Siamtu Pathian' chu pathumna aṭangin pahnihnaah a rawn inhlangkai chho leh ta. The Prophets hi an dinhmun a ṭha sawt tawh hle a, pakhatna an ni thei dawn em tih chu hriat a chakawm tawh viau mai.

Pathumna chu Gospel Group huhang ngah ber zinga mi 'Ka mit ngei hian a thlir ang' a ni a, he hla hi chart hmasa lamah khan pangana a ni a, tunah erawh pathumnaah a rawn inhlangkai der tawh a ni.

Chart-a che ṭha zual dangte chu
Angaihtei hla 'Sakeibaknei leh beramno' chu palina a ni a, Cindy Lalthanpuii hla thar ber 'Siamtu zai ngai' chu parukna a ni thung.

Euphony 'Aw Ṭhalai' chu pasarihna niin, Hruaia & Samuela 'Aw Lal ropui ber' chu pariatna a ni thung a, Lancy Remlalhruaii 'Silfai ang che' chu pakuana niin, Thartei Hmar chuan 'Ka mawi ber e' hmangin Top 10 chart a khar a ni.

Maruati 'Vanah Lawmman' zaninah YouTube-ah
Ṭhazual Awards 2020-a Gospel Best Female Artist award dawngtu Maruati'n thiam taka a sak 'Vanah Lawmman' chu zanin dar 10 aṭang hian a YouTube channel-ah thlira ngaihthlak theihin a awm dawn.

'Vanah Lawmman' tih hla hi chu kan hre fur tawh hlawmin a rinawm, kum eng emaw zat liam taah khan Vohbik khan thiam takin an sa ṭhin a, Maruati hian tunhnaiah rawn thar thawh lehin Zonet lamah chuan Inrinni zan aṭang khan an pe chhuak tawh a, zanin aṭang hian YouTube lamah a duh apiang tana thlira ngaihthlak theihin a awm dawn ta a ni.

Maruati chuan he hla hi H. Lalramthara (L), Seling puala a tihchhuah a nih thu Vanglaini hrilhin, "Covid-19 avanga an inkhunghran lai mekin, an huan hnim te sâm faiin an kawmthlang huanah a fapa nen hna an thawk a, chesual palhin kawng thlangah a lum liam ta a, a nunna a chân ta hial a ni. He hla hi a hla duh ber anih avangin ama pualin ka tichhuak a ni," tiin he hla a tihchhuah chhan hi a sawi.

Maruati chuan,"He hri avanga chhungkhat laina chân te, ruang dai tak ngial pawh kil thei lo tam tak kan awm ani tih ka hriat hian, lunsun khawhar leh ṭap mekte'n vanah lawmman kan nei a ni tih kan hriatna leh lungngaihna min chhawktu atana Pathian hmanrua a nih ka duh sak a, Pu Ramthara te chhungkua anga lo tuar ve zawng zawng te tan ka hlan ve tak meuh bawk a ni," a ti. 'Vanah Lawmman' hi Dotti Rambo phuah niin Rev Lalhunliana Royte lehlin a ni a, Maruati hian a sa mawiin a zai ngainatute tan chuan thu lawmawm tak a ni ngei ang.