UK Official Singles Chart-ah 'Football's Coming Home'

Euro boruak a lian zel a, tunah phei chuan khelmualah mai ni lo, rimawi khawvel lam thlengin a luhchilh tawh.English comedian lar pahnih David Baddiel leh Frank Skinner-te'n rock band Lightning Seeds thawhpuia kum 1996-a an tihchhuah 'Three Lions' chu UK Single Chart-ah paruknaah a rawn inhlangkai thar leh.

'Football's Coming Home' to UK Chart
England hian kum 1996-ah khan European Championship semi-final an inpet thleng a, chumi kum chu 'Three Lions' an tihchhuah kum hi a ni. Chumi hnua a hmasa berna atan kuminah semi-final an inpet thleng leh a, tunah phei chuan final an lut der tawh! Football uar ram a ni bawk a, an ram chet ṭhat kumah meuh chuan rimawi lam chart thlengin football thawm a ring ta a ni. Chart tharah phei chuan he hla hi pakhatnaah a rawn inhlangkai tawh mai thei.

Gareth Southgate-a team-te chu final khel turin an inralring tawh hle ang tih a hriat a, an ram mipuite pawhin an rimawi ngaihthlak thlengin an suk thlek an thlak tawh a ni.

Kum 2018-a World Cup semi-final an luh ṭumah pawh khan 'Three Lions' hi an ram chart chung berah a lo chuang tawh a, England hi Euro-ah an champion a nih ngat chuan he hla hi chu an ram in tinah a hla play tur zinga mi a ni ngei ang.

'Football's Coming Home' hi kum 1996 European Championship tournament lai khan kar hnih chart topper a lo ni tawh a, kum 1998-ah khan kar thum chhung ngawt chart chung berah a lo ding vang tawh bawk.

Football kaihnawih hla tho, kum 1998-a chart No.2 lo ni tawh Fat Les hla 'Vindaloo' chu 40-na a ni mek bawk a, kum 2010 hnuah Top 40 chung lama a awm leh hmasa ber a ni. Kum 2010 World Cup lai khan 32-naah he hla hi a inhlangkai lehzuai a, a reh leh vang vanga, kuminah England kawtthlerah he hla an play thawm hi hriat tur a awm leh ta a ni.

Chart-a che ṭha mek hla dang
UK Official Singles Chart-ah hian tun dinhmunah chuan Ed Sheeran-a 'Bad Habits'-in a zawnin kar hnihna chhung hma a la hruai a, pahnihna chu Olivia Rodrigo 'Good 4 U' a ni.

Galantis, Guetta leh Little Mix-te hla 'Heartbreak Anthem' chu pathumna a ni a, The Weeknd hla hit 'Save Your Tears' chu palina a ni leh bawk. He hla hi kar 26 lai UK Singles Chart-ah hian a lang tawh.

Band lar thar mek Maneskin
Tun dinhmunah chuan '3 Lions' chung chiahah hian Italian band lar, Eurovision winner Maneskin hla 'I Wanna Be Your Slave' a awm. Maneskin hla tho, 'Beggin' chu pasarihna a ni bawk.

Anni hi tunhnaiah an lar thar hle, US lamah pawh Hot 100 chart-ah 'Beggin' hi a lang mek a, US Billboard Rock Streaming Songs chart-ah topper a ni mek bawk a ni.