Science & Environment : Mizoramah Piring/Chengkawl chi thar hmu chhuak

Ashoka Trust for Research in Ecology and the Environment (ATREE), Bangalore chuan Mizoramah Piring/Chengkawl (Snail) chi thar an hmu chhuak tih tarlangin a scientific name-ah 'Pila mizoramensis' tih an phuah.

He Chengkawl thar hi Aravind N.A leh a team-te hmuh chhuah niin Phawngpui National Park-a zirchianna an neihnaa an hmuh chhuah niin an sawi a, hetiang Chengkawl hi Mizoramah pawh hmun pahnihnah chiah a awm niin an sawi bawk.

India rama Pila genus chhungkaw paruk an hmuh chhuahna a ni a, tuikhawhthlaa awm chi Pila an hmuh chhuah pahnihna chiah a ni bawk. Phawngpui National Park-a zirchianna a Chengkawl awmte zirchianna an nei zo an let leh lama kawngpui bula tuikhawthlaah he Chengkawl chi thar hi an hmu chhuak ta niin an tarlang.

Hetiang Piring hi a hming pangaiah chuan Mizoram Apple Snail tih an phuah a, cm 2.5 vela sei an ni.

India rama tuikhawthlaa cheng ṭhin Chengkawl an hmuh chhuah pakhat zawk chu 'Pila saxea' tih niin northern Western Ghats-ah an cheng thung.