Olivia Rodrigo 'Sour' thur dan a tui : BTS 'Butter' an tat kual nasa

Billboard 200 chart-ah American singer Olivia Rodrigo chuan a album hmasa ber 'Sour' hmangin ro a rel a, chutih rual chuan BTS 'Butter' pawh hit chhunzawm zelin chart eng emaw zatah pakhatna a ni.

Olivia Rodrigo 'Sour' a hit
Olivia Rodrigo chuan a album hmasa ber 'Sour' chu rinlawk ang ngeiin a hlawhtlinpui. Kar hmasa chhung khan MRC Data aṭanga a lan dan chuan US-ah ringawt equivalent album unit 295,000 a hmu chhuak a, Billboard 200 chart-ah pakhatnaah a inhlangkai nghal.

'Sour' hi R&B/hip-hop album ni si loah chuan kar khat chhunga stream nasat ber dawttu a ni. Kumin chhunga album hit ber tia sawi ngam a ni a, equivalent album unit hmuchhuak tam ber niin, Taylor Swift-in kumin atana record a lo siam tawh chu a khum. Swift-i'n 'Fearless (Taylor’s Version)' hmang khan 291,000 unit a hmu chhuak a, hei hi 'Sour' hian a rawn khum a ni.

295,000 equivalent album unit a hmuh chhuah aṭanga 218,000 chu SEA unit a ni, chu chu a album-a hla 11 awmte on-demand stream-ah vawi maktaduai 300.73 lai stream ang a ni hial. Album hralhna aṭangin 72,000 a hmu chhuak a, TEA unit 4,000 a hmu chhuak bawk.

'Sour' album-a hla awmte an duh ngawih ngawih
'Drivers License' hitmaker hlate hi American mipui khuan an duh ngawih ngawih a ni ber mai. Billboard Streaming Songs chart top 10-ah a hla pariat lai a lang! Hmeichhe artist zingah hetiang record siam thei awmchhun a ni nghal bawk.

Taylor Swift chuan nikum lamah khan he chart-ah hian a rualin hla paruk lo lanpui tawhin record a lo siam tawh a, chu chu Rodrigo hian a rawn khum ta a ni.

Hot 100 chart lamah pawh a che ṭha hle a, Hot 100 chart top 30-ah a hla 11 a lanpui vek bawk.

A vawi khatna atan Artist 100 chart-ah topper a ni bawk a, Billboard chart hrang hrangah American tleirawl duhlai hi lal fanu ang maiin a leng vel a ni ber.

Billboard 200-a che ṭha zualte
Kar hmasa lama pakhatna J.Cole 'The Off-Season' chu pahnihna a ni a, twenty one pilots album thar 'Scaled And Icy' chu pathumna a ni.

Morgan Wallen album 'Dangerous: The Double Album' pawh palinaah la awm vangin Moneybagg Yo chuan 'A Gangsta's Pain' hmangin Top 5 a khar.

Khawchhak BUTTER lian lam hawi ang aw..
K-Pop superstar BTS chuan an English single pahnihna 'Butter' chu an hlawhtlinpui leh rem rem hle a, Billboard single chart hrang hrangah a chung berah an ding nawlh nawlh mai a ni.

Single chart ngaihhlut ber 'Hot 100'-ah pakhatna an ni a, Billboard Global 200 leh Billboard Global Excl. U.S. chart-ah pawh pakhatna an ni ve ve bawk. Nikum September thlaa heng chart pahnih siam a nih hnua kar khat chhunga khawvel puma hla stream tam ber a ni hial niin Billboard chuan an tarlang.

May 21-a an tlangzarh aṭanga May 27 thleng khan US-ah ringawt vawi maktaduai 32 stream a nih bakah download aṭangin 242,800 lai an hralh. Download sales-ah hian 'Dynamite' kha an tluk pha lo deuh thung. Artist 100 chart-ah pawh pahnihnaah an inhlangkai nghal a, he chart-ah hian kar 242 lai an lang tawh. Kar hmasa lamah kha chuan 14-naah an awm a, 'Butter' hmangin pahnihnaah an rawn inhlangkai ta a ni.

Christian Songs Chart lamah Lauren Daigle a ropui
Lauren Daigle chuan a hla 'Hold On to Me' hmangin Hot Christians Songs Chart lamah ro a rel ve mek bawk a, he chart-ah hian Lauren Diagle hian reocord a lo siam tawh sa chu a khum bawk.

Hot Christians Songs Chart-a hmeichhe zaithiam topper ni ngun ber record a lo siam tawh chu amah vekin a rawn khum leh a, he chart-ah hian single panga topper a nihpui chiah a, hetiang tithei hi hmeichhe dang an la awm lo.

'Hold On to Me' hi kar hmasa khan pangana a ni a, tun karah erawh pakhatnaah a rawn inhlangkai thung a ni. Kum 2018 hnua Christian genre hla a tlangzarh leh hmasak ber niin February thla tawp dawnah khan a tlangzarh a, The Voice-a a sak hnuah khan he hla hi a rawn 'hit' thar leh a ni, a tih theih awm e.