Howard University-in Chadwick Boseman hmingchawiin College of Fine Arts hming an phuah

Lemchan thiam fam ta Chadwick Boseman kha film lar tak tak- Jackie Robinson, James Brown, Thurgood Marshall leh Black Panther lemahte a chan avangin khawvelin hre lar hle mah se, lemchan piah lamah Howard Bison mi ropui zinga mi a ni bawk.

Howard University chuan nimin khan thuchhuah siamin Dean Phylicia Rashad kaihhruaina hnuaia an din thar leh College of Fine Arts hmingah Chadwick A. Boseman College of Fine Arts tih an phuah dawn thu an tarlang a, hei hi Chadwick Boseman chawimawina leh a alumni danglam bik a nih zia tarlanna tura an tih a ni.

Boseman hi nikum August thlaah khan kum 43 mi niin cancer vangin a thi a ni. A chhungte pawhin thuchhuah siam ve nghalin Howard President Wayne A. I. Fredrick leh a Board of Trustees-te'n Chad chawimawina atana thu­tlukna an siam chu lawmawm an tih thu an sawi.

Black Panther actor Boseman kha T. L. Hanna High School aṭangin kum 1995 khan a graduate a, chutih hunlai chuan an school basketball team-ah a tel ṭhin nghe nghe. Howard University, Washington, D.C-a a luh dawn pawh hian basketball khel tura thlan a ni a, mahse arts lama kal thlang zawkin kum 2000 khan Bachelor of Fine Arts in directing a zo a ni.

Chadwick Boseman-a Twitter account-ah chuan hetiang hian an tarlang a ni:-

"Howard University- 1997- University zirlaite chuan ṭhalai Chad Boseman kaihhruainain College of Fine Arts kehchhe tur chu dodalin administration building-ah duh lohna an lantir a ni. Kum eng emaw zat a ral hnuah pawh Chadwick leh alumni dangte chuan College of Fine Arts a din leh theihna turin dilna an thlen chhunzawm zel bawk.

2018- Chadwick Boseman chu Howard-ah Commencement Speaker niin a kir leh a, chutah chuan President Wayne A.I Frederick chuan College of Fine arts independent college anga din thar leh tura ruahmanna a awm thu a puang.

Kar hnih lek liam taah khan mi ṭha chungchuang Phylicia Rashad chuan College of Fine Arts Dean a ni dawn tih puan a ni a, vawiinah erawh chuan chu college din thar leh chu kan lal chawimawina atan a hming an puttir ta tih kan puang e.

Chad, Howard laimu hlutna leh ropuina, hmahruaina, a hnathawhna leh a dikna i lantir a ni. Hetiang chawimawina hi nang aia phu an awm lo. Kan chhuang che a, kan hmangaih che a, nitinin kan ngai che," tiin.