Science & Environment: Mihring ṭhian hmasa ber Ui?

Mihring ṭhian ṭha ber 'ui' hi mihring ṭhian hmasa ber pawh an ni mai thei niin mithiamte'n ui DNA an zirchian hnuah an sawi chhuak mauh mai. 

Ancient Genomics laboratory, London's Crick Institute chuan ui (dog) DNA zirchianna neiin kum 11,000 liam ta velah khan mihring hian ui an lo vulh daih tawh niin an hmu chhuak a, ramsa dang zawng aiin an vulh hmasa niin an hria.

Ui DNA zirchianna kaihruaitu Dr Pontus Skoglund chuan BBC hnenah pawh hemi chungchang hi hrilhin mihring zawng zawngin sa an veh lai daih tawha sa ei chi ui an lo vulh daih tawh chu thil danglam tak a nih thu a sawi.

Mithiamte hian hmasang ui (ancient dog) chi hrang hrang 27 genome zirchianna an nei a, hengte hi tunlai ui nente khaikhinin, ui ṭhenkhat, thlahtu bul inang nia an hriatte pawh an tarlang tel nghe nghe a ni.

Heng zirchianna an neih hi Europe mai ni lo, khawmualpui danga uite pawh an zirchiang vek a ni. Zawhte chu kum 6,000 liam ta, mihringin thlai chin nachang an hriat hnuah chauh vulh a nih an ring thung a, an thlai eichhetu sazu leh chaichim vel laka an thlai vengtu tura an duh avangin an vulh chauh a nih an ring.