Japan-ah ‘Demon Slayer’ a hit

Japanese box office-ah chuan Anime movie 'Demon Slayer: Kimetsu no Yaiba the Movie: Infinity Train' a hit hle a, $maktaduai 167.2 a lalut der tawh.

'Demon Slayer: Kimetsu no Yaiba the Movie: Infinity Train' hi October 61-a an tlangzarh kha niin an tlangzarh aṭanga ni 17 a ral hnuah Japan-ah ringawt pawh $mtd 150 chuang a lalut tawh a, tun kar tawp liam taah ringawt pawh khan $mtd 24 a lalut leh a ni.

'Demon Slayer' hian tlangzarh a nih aṭanga ni 10 hnu lekah khan $mtd 100 a lalut hman a,  kumin chhunga Japan-a film sum lalut tam ber a ni der tawh.

Anime tuipuitute tan chuan ‘Demon Slayer’ hming hi thil thar a ni hauh lo ang. Japan pawh khi Anime buaipui ram an ni bawk a, hetiang taka a 'hit' hi a mak loh rualin hrileng kara hetiang zat zat sum a lalut erawh hi chuan ngaihven a hlawh hle thung.

Japanese cinema history-a $mtd 150 lalut rang ber a ni nghal der tawh a, hei hi chu a film siamtute beisei phak bak a nih tawh ngei ang.

'Demon Slayer' hi a manga series pawh a hit sa hle hrim hrim a, nikum April leh September inkar khan anime series pawh pe chhuak tawhin hei pawh hian lawm a hlawh hle a, Japan mipuite'n an kham lo tih a hriat; a movie an tihchhuah meuh chuan Japan record a break nghal der mai a ni.

A anime pawh kha 2010's-a anime ṭha ber zinga mi nia ngaih a ni a, kumin October thleng khan a manga pawh copy maktaduai 100 chuang an hralh tawh a, khawvela manga hralh kal ber zinga mi a ni der tawh bawk.

Nakkum kum tir lamah hian North America lamah pawh an tlangzarh hman beisei a ni a, Aniplex leh Funimation kaltlangin an tlangzar ang.