Box Office: Come Play sum lakluh a tam ber

North America Box Office-ah film thar Come Play-in sum a lalut tam ber a, kar hmasaa pakhatna Honest Thief chu pahnihna niin The War with Grandpa chu pathumna a ni thung.

Come Play hi horror thriller film a ni a, Jacob Chase direct a nih bakah script pawh a ziah a ni nghal bawk.  Gillian Jacobs leh John Gallagher Jr.-te channa niin October 30 khan US-ah tlangzarh a ni a, kar tawp liam taah khan theatre 2,360-ah pek chhuah niin $3,119,875 a lalut a ni.

He film chungchangah hian critics lam ngaihdan a inang lo hle a,  Rotten Tomatoes-ah chuan review 82 aṭangin 52% a hmu phak a, film hmuhnawm pangngai tak a ni tih a hriat. Smart phone leh mobile device kaltlanga naupang bei ṭhin ramhuaiin chhungkaw pakhat a tihbuai dan vel a nih hmel a, a hmuhnawm phian a ni ngei ang Box Office-a sum lalut tam ber a rawn ni nghal tlat. 

Horror thriller film ngai­natute tan chuan film nghah­hlehawm tak pawh a ni ngei ang.

Honest Thief chu kar hnih chhung sum lalut tam ber a nih hnuah pahnihna a nih ve a ngai ta a, theatre 2,360 aṭang­in $1,373,079 a lalut a ni. The War with Grandpa pawh pathumna la ni phakin $mak­taduai chuang a lalut bawk.

Film thar tlangzarh a tam lo a, Box Office Top 10-ah pawh film re-release an inlar nasa. Chutih rual chuan film thar Spell chu pakuana a ni a, Tenet pawh palina a ni ve bawk. Hripui leng vangin theatre hawng an la tlem a, boruak a pangngai laia 4k chuang hawn ni ṭhin kha tunah chuan 2k vel bawr chiah hawn a la ni zel a, hemi vang hian film industry hmunpui North America lamah chuan Box Office-a sum chevel a tlem hle.