ACM Award-ah Kelly Clarkson

Country music huanga chawi­mawina ngaihlut ber, Academy of Country Music Award (ACM Award) chu April thla tir hian sem a ni leh dawn ta a, a boruak pawh a hot leh tawh hle. Kuminah hian American Idol hmasa ber Kelly Clarkson chu perform tur zingah a tel a, ngaihven a hlawh hle a ni.

ACM Award-ah hian Kelly Clarkson bakah - Khalid, Kane Brown, Brandi Carlile, Dierks Bentley, Jason Aldean leh Dan + Shay te pawh an inlan dawn a, country music ngainatute tan chuan a nghahhlelhawm tawh khawp ang le.

Heng bakah hian Country Music Hall of Fame-a lakluh mai tur Brooks & Dunn bakah Luke Combs te chu hming langsar an ni a, ACM Award award ṭum 32 zet lo dawng tawh Miranda Lambert a la awm cheu bawk. Lambert hi ACM Award dawng hnem ber a ni mek a, ṭum 24 zet a lo perform tawh bawk a ni.

54th Academy of Country Music Award hi April 7 khian Las Vegas-ah sem a ni dawn a, category ṭhenkhatah chuan winner puan a ni tawh.