Black Hole chu vanthengrenga thil awm, hîpna nasa tak nei, a hîpna a chak em avanga êng takngial pawh a kal chhuah theih lohna hmun, arsite thlanmual a ni. Hetiang black hole rapthlak mangkheng hi tunhnai khan hmuhchhuah a ni.

Black hole an hmuhchhuah thar hi a lian hle a, kan ni aia a lêt tluklehdingaw 12 zeta muk zawk a ni a, black hole hi quasar laia awm a ni. Quasar hi kum 1963 khan hmuhchhuah a ni a, a chanchin hi scientist-ten uluk takin an zir reng a, hriat erawh a la tlem hle.

Black hole an hmuhchhuah thar hi SDSS J0100+2802 tia vuah a ni a, kan awmna khawvel aṭang hian êng kum tluklehdingawn 12.8 zeta hla a ni. Big Bang aṭanga kum maktaduai 900 vela insiam ṭan nia ngaih a ni. Astronomer-te tibuaitu pakhat chu hetiang taka lian black hole ni si, a insiam ṭan hma lutuk hi a ni. Astronomer-te chuan Big Bang aṭanga kum maktaduai 800 velah hi chuan arsi hmasate leh galaxy hmasate a awm chauh niin an ngai.

Australian National University-a mi, Dr Fuyan Bian chuan, "Hetiang khawpa lian black hole insiam ṭan hma lutuk hi tuna theory kan neih angte hmang chuan hrilhfiah ngaihna a awm lo a ni," a ti hial.

Black hole hi arsi lian, kâng zo ta, inhlâwm muk vak a ni a, a lêt tam takin a sâwng tê vak a, a hîpna erawh a chak em em. Black hole aṭang hian êng zung mai bakah, electromagnetic radiation te pawh a chhuak thei lo a, a hîp bet vek thei a ni.

Share this Post