Zaninah champion beisei Atletico leh Barca inlan dawn
Spanish La Liga-a champion beisei team pali zinga pahnih chu zaninah an inlan dawn - Atletico Madrid-in zan dar 10:30-ah Huesca an mikhual dawn a, Barcelona-in zan dar 1:30-ah Getafe an mikhual dawn thung.
Nizan khan team pahnih elpui Real Madrid leh Sevilla an inlan bawk a, he thu buatsaih a nih lai hian result kan hre hman lo - he thuziak i chhiar meuh chuan an inthlauhna a dang leh nuaih tawh ang.
Atletico Madrid-in tun hnai result vangin league nomawi an chawi lo mai dawn a lan hnuah an intuaithar a, an match hnuhnung berah 5-0 in Eibar an sawp. Zaninah Huesca hneh an inbeisei ang.
Barcelona hi Copa del Rey nomawi chawi hlim an nih avangin an phur vanglai tak a ni a, an champion hnu lawkah coach Ronald Koeman chuan, "Tunah chuan kan nomawi hmasa ber kan chawi ta a, La Liga-ah a tawp thlengin kan ṭang ang," tia a sawi zui avangin champion aia hniam an ngaihtuah a rinawm loh.
Suarez tel lohna
Atletico hian an league match hnuhnung berah hliam vangin Luis Suarez leh an player manto Joao Felix an chhawr thei lo a, mahse, player pahnih tel loin harsatna an tawk lo.
Madrid khaw club hian an league match hnuhnung berah an forward pahnih tel lo hian Eibar an mikhual a, Yannick Carrasco-a'n goal khat a khung bakah Ángel Correa leh Marcos Llorente-ten goal hnih ve ve khungin harsa lo takin an hna an tlin.
Felix leh Suarez hi zaninah an la inlan thei dawn lo a, a bik takin Llorente mawhphurhna a sang leh dawn. Kum 26 mi midfielder hian tun season-ah match 38 khela goal 12 khungin assist vawi kua a nei tawh.
Huesca hi table-ah 17-na an ni mek a, 18-na Real Valladolid nen an point hmuh zat a inan avangin tlak hlauhawmah an awm mek - an dinhmun chhiat avangin thih tha nen an bei dawn a, Atletico tan awlsam taka chak a theih bik lo ang.
Hei le Barca
Copa del Rey nomawi an chawi avangin Barca dinhmun chhe tak chu a indinthar leh mekah ngaih a ni a, zaninah an insiamṭhat tak tak leh tak tak loh a hriat ang.
Zanina Barca mikhual tur Getafe hi table-ah 15-na ni mek mah se point 31 chauh an la nei a, relegation zone aṭanga an himna hi point li chauh a ni - him an duh chuan zaninah Barca hneh an mamawh tih an hria ang. Getafe hi an league table aṭanga teh tur an ni lo - an match hnuhnung berah a zawna Liverpool leh Barcelona hnehtu Real Madrid chu 0-0 in an lo chelh thei a, an phur vanglai tak a ni.
Hei mai a ni lo - team pahnih intawn hmasakah Getafe hian 1-0 in Barcelona hi an lo hneh tawh a, Catalan club an hneh thei tih inhre chungin an inlan ang.
Messi chelh nan
Nipuiah Messi contract-a zo tawh dawn a, Barca-in an thiampuipa hi chelh an duh - mahse, Argentine forward chelh tur chuan Catalan club tan nomawi chawi a ṭul a, Copa del Rey ringawt hi Messi 'meuh' chelh nan a tawk lo.
Catalan club-in Champions League nomawi an chawi theih tawh bawk si loh avangin an tana pawimawh chu La Liga champion a ni, tih a chiang a, team hmingṭhatna piahlamah Messi chelh nan champion a ṭul - champion tur chuan zaninah chak phawt a ṭul.
Messi-a'n tun season inelna hrang hrangah match 40 khelin goal 31-a khung tawh a, assist vawi 13-a nei bawk. La Liga bikah goal 23-a khung tawh a, Getafe squad pumpuiin tun seasona league goal (22) an khung belhkhawm aiin a khung hnem zawk!
Zaninah Barca tan Messi a pawimawh leh dawn tihna a ni a, Argentine forward hian a theihna anga a khelhchhuah phawt chuan Getafe tan chak beisei loh a finthlak ang - Barca hian regular player zingah inhliam sa Ansu Fati and Philippe Coutinho tih loh chu player inhliam tharlam an nei lo.
