Vawiinah NECS Cup Semifinal thawh khatna
Aizawl DFA buatsaih NECS Cup 2019-ah a thiam pali chiah an dam ta. Vawiin chawhma dar 11:00 hian champion lai Ramhlun South leh Republic Veng te an inkhel ang a, tlai dar 1:00-ah Armed Veng leh Lengpui te an inhmachhawn ang.
Semifinal hi double leg-a khelh tur a ni a, second leg hi April 25, Nilainiah khelh tur a ni.
Sawmfela vs Valpuia
Mizoram striker pahnih Malsawmfela leh F. Lalrinpuia te an inhmachhawn dawn a, Sawmfela hi Ramhlun South chhuanvawr niin Valpuia hi Republic Veng hmachhuan a ni thung.
Tun hma lam deuha Lalvulluaia, Ramhlun South leh Vanlalfela, Republic Veng te inkhel hmu pha chuan tun ṭuma striker ṭha pahnih intawng tur hmuhnawm dan tur chu an suangtuah thiam ang.
Champion lai Ramhlun South hi squad nei ṭha zawk an ni a, CYMA Football 2018 final-ah pawh an chungnung zawk. Chutihrualin Republic Veng hian tun hnaiah nasa takin hma an sawn a, veng mipuiin, "Kan zui zel mai phawt ang che awle' tih thupui hmanga an thlawp tlat avangin an tlo viau tura ngaih an ni.
CYMA Football 2015 final rematch
Kum 2006 khan CYMA Football-ah Lengpui an champion a, hemi hnu hian Mizoram pum huap inelna an champion leh theihna hun ṭha chu 2015 CYMA Football final-ah Armed Veng lakah a thamral.
Armed Veng hian Lalramchullova an chhawr thei dawn lo a, mahse Lalfakzuala leh player ṭha dangin an la ho thei. Lengpui lam hi Rohmingthanga leh a nau Lalchhuanmawia thlawp turin rawlthar ṭhahnem tak an kawl a, player an nei ṭha zawk hiala sawi theih an ni.
Amaherawhchu an inkhelhna tur hmun hi Lammual a ni a, helai hmun hi Armed Veng tlangnelna niin CYMA Football vawi nga leh NECS Cup nomawi chawi tawh team hi Lengpui hian rilru huaisenah an pha ang em tih hi zawhna chu a ni.
Semifinal
1st Leg - Vawiin Inkhel Tur
Ramhlun South 11:00 AM Republic Veng
Lengpui 01:00 PM Armed Veng
2nd Leg - March 27, Nilaini
Armed Veng 11:00 AM Lengpui
Republic Veng 1:00 PM Ramhlun South
Note :
1. First leg leh second leg belhkhawma an la inhnehtawk a nih chuan extra time 15+15 khelh a ni ang. An la inhnehtawk a nih chuan penalty shootout hmangin chak zawk zawn tur a ni.
2. Inkhelh hun chhung hi minute 90 a ni a, final khel tur zawnna hi double leg a nih avangin minute 180 khelh a ni ang.
3. Inkhel en man hi Rs 30 a ni.
Quarterfinal
March 22, Zirtawpni
Hualngohmun 0 - 3 Republic Veng
REP : F.Lalrinpuia 13'; Lalhmingmawia 61' (OG);
Lalnunzira 74'
Ramhlun South 2 - 1 Chhinga Veng
RAS : Malsawmfela 44', 109'
CHH : Lalbiaknia Royte 43'
March 23, Inrinni
Lengpui 3 - 1 Chanmari West
LEN : F.Lalremsanga 29'; Joe Zoherliana 64';
Clement Zonunhlua 89'
CHW: Lalremmawia 90'
Chanmari 1 - 2 Armed Veng
CHA: Lalnunzama 42'
ARV: Lalfakzuala 20'; Lalbiakhlua 120' (P)