June 15-ah Fury inlan dawn

Deontay Wilder-a'n fighter dang a hmachhawn dawn takah chuan Tyson Fury pawhin boxer dang a hmachhawn a ṭul a, June 15 khian Tom Schwarz nen Los Angeles khawpuiah an inhnek dawn.

Kum 29-a upa fighter hian US broadcaster ESPN nen tun hnaiah khan pound maktaduai 80-in inremna an ziak a, ESPN hian fight a hmachhawn leh tur panga an pe chhuak dawn - contract thar a ziah hnua tun hi fight a hmachhawn hmasak ber tur a ni.

Fury chuan, "Ka inthazo em em a, fight hmachhawn tur hian ka inpeih tawh takzet," a ti a, a khingpui tur fak nghalin, "Schwarz hi la tlawm ngai miah lo, kum naupang leh tum nei sang tak a ni," a ti.

Kum 24 mi Schwarz hian fight vawi 24 a hmachhawn tawhah hnehna a la chang vek a, Fury tan German boxer hi hneh a awlsam lo ang.

Fury chuan Las Vegas khawpuia an inhnek tur chungchang sawi nghalin, "Naupangte ni chunga boxing khel chuan America nghawrnghin hi kan beisei ṭhin a ni a, a zawna a vawi hnih nan mipui tam tak hmaah ka inhnek dawn a ni," a ti a, a phur hle.

British boxer-in Schwarz a hmachhawn tur thu a chian rualin Wilder nena an chanchinin ngaihven a hlawh nghal a, Fury co-promoter Bob Arum chuan a boxer hi Wilder nen an inhmachhawn ngei tur thu a sawi.

Arum chuan, "Fury hian hnehna a chang a nih chuan USA-ah fight a hmachhawn leh ngei dawn a, February-ah Wilder nen an inhmachhawn nawn ka beisei," tiin a sawi.