Chhinga Veng tan beisei a tawp

Mahuma Memorial Cricket Tournament khelh mekah Inrinni khan Chhinga Veng chuan innings khat leh run 115-in Ramhlun Venglai an ngam lo a, Kulikawn CC final luhna kawngka hawngtu an nih rualin an tan beiseina a tawp thung.

Kulikawn hian Ningani khan Armed Veng chu innings khat leh run 72-in an hneh a, league match an khelh tur khel zo tawhin point 31 an nei - Chhinga Veng an chak zawh loh takah chuan Kulikawn aia point hmu hnem thei an awm tawh lo a, final an lut ta a ni.

Suaka Cricket Ground-ah Ramhlun Venglai an bat hmasa zawk a, over 88.5 thleng daihin run 276 an siam - run 90 siamtu Remruatdika Ralte a che ṭha hle.

Chhinga Veng bat hun a thleng a, over 24.3-ah run 161 siamin wicket sarih an hloh - Durtlang tlangval K. Vanlalruata chuan ball 65 lekah run 89 siamin a team tan a che pui hle.

Mahse, K. Ruata chet ṭhatnain 3C a chhan zo lo - an player pathum ngawt an inhliam zui a, inkhel chhunzawm thei an nih loh avangin second innings pawh khelh a ni lo a, Ramhlun Venglai an chak.

Vawiinah Zarkawt Lords leh Bawngkawn South an inkhel leh dawn a, Lords hian hnehna an chang a nih chuan final an lut nghal ang.