NBA playoff khel lo tur LeBron James

Basketball player piang tawh zinga ropui berte zinga mi LeBron James chu kumin NBA playoff-ah a hmel kan hmu dawn lo! James-a khelhna Los Angeles Lakers hian an match hnuhnung berah Brooklyn Nets chu 111-106 in an ngam lo a, an tan playoff beiseina a tawp nghal bawk.

James hian 2005 hnua lamah NBA playoff a khelh lohna hmasa ber tur a ni a, a zawna season nga chhung a thiam pariat zinga inlan phak lo Lakers hi ropuina ram a thlenpui theih beiseitu awm mah se, Eastern aṭanga Western Conference lama insawmna hmasaah beisei angin a hlawhtling nghal lo.

Hliam chu
Nikum December 25, Krismas lai kha Los Angeles Lakers tan chan tun season chhunga an tawn san vanglaia ngaih theih a ni. Lakers hian NBA champion lai Golden State Warriors chu 127-101 in an hneh.

Hetih hunlai hian NBA regular season kal laiah match 20 hnehna an chang tling chiah a, vawi 14 chak loh nei mah se Western Conference table-ah palina an nih avangin an dinhmun a ṭha hman hle.

Golden State an hneh ṭum hian an thiampuipa James hi a ṭhâl vei lam hliam vangin lakchhuah a ngai. American forward hian, "A rang thei ang berin basketball court-ah ka rawn let leh ang," tiin Lakers fans ho chu lungngai lo turin a chah.

Mahse maw...
Mahse, kum 34 mi James hian a hliam vangin match 17 ngawt a khel thei lo chhunzawm a, basketball a khelh hun chhunga a chawlh rei ber ṭum a tawng hial. January thla khan guard Lonzo Ball chu ke rek hliam vangin an chân zui bawk.

Lakers boruak a ṭha chhuak thei mai tawh lo, tun thla tir khan an team zinga season duhawm hmang mektu small forward Brandon Ingram chu hliam vang bawkin a season a tawp.

James leh a ṭhiante hliam chhungin Lakers hian match rukah chiah hnehna an chang a, playoff khel phak chin (pariatna) aṭanga nek chhuaha awmin an let tawh lo. Tun thlengin match 31-ah hnehna chang tawh mah se ṭum 41 an tlawm avangin 11-na an ni mek.

A thlawn mai maw
LeBron James bik hi chuan a kum tam deuh tawh mah se hliam a neih loh chuan ṭha takin a la khel chhuak thei. Tun season bikah chawlrualin match khatah point 27 score zel ang a ni a, assist leh rebound pawh ṭum riat zel nei anga chawlrual a ni bawk.

Lakers hian season dang aiin hmasawn an tum a, Miami Heat leh Cleveland Cavaliers tana a khelh laia NBA Finals vawi riat khel zawn tawh James bakah hian tawnhriat ngah - Rajon Rondo, Lance Stephenson, Javale McGee leh Michael Beasley te an neih vangin beiseina an nei sang.

Amaherawhchu, Lakers hian an mamawh vanglai takin James an chhawr thei lo a, American tlangval a awm loh chhungin player ṭhenkhat an khelh ṭhat loh bakah hliam vanga chawl an awm deuh reng bawk - tun season bika an beisei ber playoff chu an mangṭha a ngai.

Hmabak film?
NBA playoff an khelh dawn loh avangin James hian nipui laiin hun awl a ngah phah dawn tihna a ni a, tun nipui laia an buaipui tur pakhat Space Jam 2 film atan hun a ngah phah dawn tihna a ni.

James-a'n Lakers a zawm tirh khan mi tam takin Hollywood vang niin an puh a, mahse khatih hunlai khan James hian, "Basketball bika chona thar ka hmachhawn duh vang," tiin a sawi. Playoff an khelh dawn loh takah chuan film nena sawizawm tute an bengchheng zui leh ngeiin a rinawm.

Tun hmain film pakhat Trainwreck-ah James hi a lo inlan tawh a, tuna a inlan lehna tur Space Jam 2 hi kum 2021 July 16-a tlangzarh tura tih chian a ni tawh, kum 34 mi James hian basketball khelh a chawlsan hnuah film lam hi a luhchilh a nih pawhin a mak lo ang.

Warriors tlawm chiang
Nimin zing khan NBA champion lai Golden State Warriors chu Dallas Mavericks lakah 126-91 in an tlawm a, an muala an tlawmna hi 2007 hnu lamah an chak loh chian ber ṭum a ni nghal bawk.

Oracle Arena-a inkhelah Golden State hian an thiampuipa Stephen Curry an chhawr lo a, guard Curry awm loh niah an mualpho. An chak loh avang hian Western Conference hmahruaitu an nihna chu Denver Nuggets lakah an chan nghal bawk a ni.

ESPN data aṭanga a lan dan chuan GSW hian 2007 hnua an chak loh chian ber ṭum an tawn bakah, 2014 aṭanga enkawltu Steve Kerr kaihhruaina hnuaia an tlawm chian ber ṭum a ni tel bawk.

Playoff khel tura tling tawh Warriors tan chak loh hi mualphona a ni satliah lo, an hneh loh Mavericks hi Western Conference table-a hniam ber dawt an ni a, vawi 29 an chakna a nih ve chiah laiin Kerr-a naute erawh ṭum 49 hnehna chang tawh an ni thung.