Vanglaini - MZI-in zai man bithliah a siam

KHAWTHLIR

MST bus hun

Transport department chuan, mipui tana remchan zawkna vangin Aizawl-Silchar MST bus service chu chawhnu dar 1-a chhuak tawh loin, zing dar 6-ah a chhuak ṭhin dawn tih a tarlang. Hei hi vawiin aṭanga hman ṭan a ni ang.

Medal lawmpui

Mizoram State Sports Council (MSSC) chuan nimin khan an office-ah tun hnaia infiamna chi hrang hranga Mizoram tana medal dawngtute chawimawimna hun an buatsaih a, Mizoram Commission for Women chairperson Vanlalawmpuii Chawngthu, MLA-in a hmanpui.

MCCF din cham

Mizoram Cancer Care Foundation chuan vawiin chawhma dar 11-ah Zemabawka Mizoram State Cancer Institute-ah an din champha an lawm dawn a, an member-te a tam thei ang ber kal turin an insawm.

Training buatsaih

World Vision India, Chhimtuipui ADP chuan nimin khan Lawngtlai Press Club-ah an area chhunga ṭhalai, thil chi hrang hrang training tura an thlante tan training an buatsaih. Training tura thlante chu puanṭhui zirtur mi 24, computer zirtur mi 12, motor khalh zirtur mi pahnih leh mechanic zir tur mi pahnih an ni.

Women’s Day

Mizoram University-a Public Administration buatsaihin nimin khan MZU-ah International Women’s Day an hmang a, 'Women in governance and their participation in politics' tih thupui hmangin workshop buatsaih nghal a ni. International Women’s Day hmannaah hian MZU vice chancellor Prof. R Lalthantluanga khuallian a ni a, zirtirtu leh zirlai ṭhahnem tak an tel. International Women’s Day hi March 8 a ni a, Pathianni a nih avangin niminah an hmang a ni.

Ruihhlo man

Excise & Narcotics department chuan nimin khan Edenthar-ah Lalruatthanga (23), Phunchawng Veng nia insawi hnen aṭangin heroin grams 3.15 an man. Lalruatthanga hi thubuai siam sak a ni.

DAWNTISEI

MZI-in zai man bithliah a siam

Mizo Zaimi Inzawmkhawm chuan solo artist-te zai man bithliah a siam thar a, a hniam ber pawh Rs. 3,500 man aia tlem lo nise, a ti. MZI hian zaimi te rawih man 'Minimum wages' chungchang an sawiho a, hetah hian mahni awmna khuaah zaithiamte zai tura rawih/sawm an nih in vawi khat rawih man Rs. 3,500 aia tlem a ni tur a ni lo a ti.

MZI-in ruahmanna thar a siamah hian mahni awmna khua chhuahsan a ngai a nih chuan vawikhat rawihah Rs. 5,000 aia tlem lo turin a siam a, hei bakah hian a ruaitu ten kal man, ei leh in leh thlen mante an tumsak turin a titlu bawk.

Rawih man a siam thar hi zaithiamte rawihna man tur pangngai tihna ni loin, a tlem berah pawh hetiang zat tur hi a tihna a ni. Artist hrang hrang ten hei aia sanga anmahni rate an neihte chu MZI Gen.Hqrs chuan a pawmpui tih MZI thuchhuah chuan a tarlang bawk.

Share this Post

Login to comment

No Comments