Number 1 Osaka a tla

Hmeichhe tennis world number 1 Naomi Osaka chu Miami Open-a a match hnihnaah a chak lo nghal, vawi riat champion tawh Seren Williams chu khup hliam vangin hun tepter tawh takah a inhnukdawk bawk a ni.

Nimin zing inkhelah Osaka hi Hsieh Su-Wei nen darkar hnih leh minute 18 an inkhelh hnuah 4-6, 7-6(4), 6-3 in a tlawm a, Japan nula hian a vawi khat nana Miami Open champion nih a tumna chu a ti hlawhtling thei dawn rih lo. Taiwan player Su-Wei hian a match lehpekah chuan world number 1 pawh lo ni tawh Caroline Wozniacki a hmachhawn ang. Denmark nula hian Romanian player Monica Niculescu chu a lo hneh ve bawk a ni.

Champion tura rinkai Serena hian Rebecca Peterson hnehin third round a lut a, Chinese nula Wang Qiang nena inhmachhawn leh tur ni mah se a khup hliam vangin a inlan zui thei lo. Kum 37 mi Serena chuan, "Ka inkhel zui thei lo hi pawi ka ti takzet, Miami hi min ṭantu awm tamna hmun a ni tih ka hria, min ngaina tute hmaah hian nakkumah tun aia ṭha zawkin ka rawn inlan leh theih ngei ka beisei," tiin a sawi.

Inkhel dangah world number 2 Petra Kvitova chuan Donna Vekic lakah fiahna tawk mah se a paltlang a, darkar hnih chuang an inkhelh hnuah 6-4, 3-6, 6-4 a hnehna changin fourth round a in vaw kai - Wimbledon vawi hnih champion tawh hian Caroline Garcia a hmachhawn leh ang.