The Highland Voice zawhfel a ni ta
Sap hla hmanga intihsiakna 'The Highland Voice' chu February 28, Ningani zan khan Folkland Park-ah Grand Finale neih a ni ta a, top 5-ah C. Lalrinzuala (Amtea), Lalnunpuii Hauzel, Emmanuel Lalremruata, Josephine Lalruatfeli (Jojo) leh Lalruatpuii te an lang.
The Highland Voice buatsaihtute chuan top 5 te hi UK-a reality show lar tak The X-Factor-ah an inlan theihna turin hma an la dawn a, a hlawhtling a nih chuan thil chhinchhiah tlak tak a ni ngei ang.
Grand Finale
The Highland Voice-ah hian finalist mi 14 an awm a, top 5 inhlai kai tumin Grand Finale-ah an thiam thil an lantir. Finalist te hi Zoram dung leh vangah pawh hriat hlawh tak tak te an ni hlawm a, intihsiak boruak pawh a nung ṭha hle.
Judge ten ngun taka an thlitfim hnuah a ṭha zual mi panga an thlang chhuak a, zaithiam tak tak te pawh thlahliam an ni ta a ni.
Top 5 te chu...
Finalist mi 14 zinga a ṭha zual thanchhuah mi panga te hian talent an nei ṭha a, zahpuiawm loh tak tak vek an ni. Zai lamah chuan an ni aia ṭha an awm dawn chuang em ni tir tur ṭhiau an ni a, Mizo mipui te pawhin an zai kan lo ngaithlak fo tawh te an ni.
C. Lalrinzuala (Amtea) zaithiam zia sawi nawn a ngai lo - Zorimawi khawvela a sulhnu zozai te sawi vek sen a ni lo. Amtea hian Mizo hla ai mahin sap hla a sa thiam zawk emaw tih mai tur a ni a, top 5-ah a inhlangkai pawh hi thil mak a ni lo.
Lalnunpuii Hauzel hi mi tam tak chuan kan hmelhriat tawh ngei ang. A zaithiam em em a, sap hla sak pawh a hnehsawh hle a ni. Emmanuel Lalremruata pawh hi zai lamah chuan talent nei ṭha ber te zinga mi niin, endiktute mit a tlung hle a ni.
Mizoram Talent Hunt 2018-a pakhatna Josephine Lalruatfeli'n a thiam a la theihngilh lo - a ti ṭha ber te zinga mi a ni. Jojo-i hi kum naupang te ni mah se zai lamah chuan tawnhriat ngah tak a ni a, a puitling tawh ti pawhin a sawi theih awm e. Zoram mipui zaia lo awi fo tawhtu Lalruatpuii chu top 5-ah hian a lang bawk a, ani pawh hi ngaihtuah awm loh tak tur a ni.
The Highland Voice hi February thla tir lam khan ṭan niin, audition-ah mi 60 an inlan. Contestant te hi thlitfim chhoh zel niin, a tawpah a ṭha zual mi panga thlan chhuah an ni ta a ni. Top 5 te hi The X-Factor-ah an inlan theih nan hmalakpui an ni dawn a, an senso zawng zawng pawh tumsak vek tura ruahman a ni.