Bethsy duhzawng Pathian Ṭih mi leh inthunun thei
US-ah a kal a, chumi hnuah nikum khan Australia-ah Bethsy Lalrinsangi hi a kal leh. Australia-ah hian zaia rawngbawlna hmun hrang hrangah a nei a, amah hmun pahnihah concert a nei bawk.

Australia-a a kalna chung­changa Bethsy-i kawmnaah, Bethsy-i hian ngaihzawng lam pawh a sawi chhuak a, i ngaihven zawng a nih a, amah i duh bawk si chuan, a duh anga i nun ngei a ngai ngei ang. Bethsy-i'n mipa a duhzawng chu 'Pathian ṭih mi, innghahna tlak, mahni inring tawk leh inthunun thei' a ni. I duh a, i star em em a nih chuan a duh ang hi puitlin tum ngei chi a ni ang. Bethsy-i hi Australia-ah hian thla khat leh a chanve a châm a ni.

Bethsy-i chuan, "Ka kal chhan ber chu Apostolic Penticostal Church (APC)-in biak in hmun an leina atana sum tuak an duh a, chumi atan chuan min sawm a ni ber. Keimahin West Melbourne leh East Melbourne-ah te concert ka zuk nei a ni," a ti. "Ka châm chhung hi a rei vak lo nain thil tam tak ka ti hman. Concert ka neih bakah hian Pathianniah kohhran hrang hranga Chin unaute zingah Pathian faka zai tura min sawmna ka tihlawhtling thei. Hei bakah hian sightseeing min neihpui a, Chin Visual Revival Conference 2014 programme ṭum khatna, Melbourne-a nghahah zaia rawngbawlin hun ka hmang bawk," a ti.

Australia-a Kristianna chung­changah Bethsy-i chuan, "An Kristianna a la ṭha ang reng hle a, an ram hi Kristian ram tia chhal ngat a ni. Kristian pawh zaa 70 lai an ni a, biak in tinah kohhran member inkhawm an ṭhahnem a, a thlamuanthlak khawp mai," a ti. "A ram a mawi a, ka hmuh tum aiin a let eng emaw zatin a mawiin a nuam a, Mizoram nena inanna lai pawh a tam mai. A bikin tlang tam tak hmuh tur a awm bakah, tlang panga in lang ve ṭhup te khan Mizoram min ngaihtuah chhuahtir fo," tiin a sawi bawk.

Bethsy-i zin hian a tlawh kual hnem phian a, Australia-a khawpui lian leh pawimawh tak tak, Perth, Adelaide, Canberra leh Sydney-te a tlawh. A naupanlai aṭanga a hmuh chak em em Sydney opera House pawh a tlawh bawk, a vannei bik hle.

"An ram economics a ṭha hle a, ei leh barah an intodelh hle. Thlai leh theirah pawh duhthusamin an ngah a, a bikin leilung hausakna, lungalhthei leh tuialhthei thlengin an supply hneh a, an intodelh khawp mai. An nunphung a hmuhnawm a, ṭhalai an hmelṭha a, hmuh an nuam em em a, ram changkang tih takah tu pawhin anmahni kutkawiha intodelh an tum hian rualawh a tina hle. Khawlaiah rui buai leh hnawksak taka che hmuh tur an awm lo a, hetihlai hian kan rama kan strict thar em em, mei zuk kawngah erawh chuan an zalen a, mei zu put put hmuh tur an awm nual. Hei hi Mizoram min tluk lohna lai niin ka hria," a ti.

Incheina lamah tumah an in-care vak lo tih Bethsy-i hian a sawi a, a duhtui leh pangngai tak an awm laiin, puan tlem te te inbel an awm nual niin a sawi bawk. Sam rawng pawh a inang nasa ve hle tih a sawi a, mahse midang incheinaah an buaiin, sawisel tum emaw, inen eng emaw vak a awm lo a ti. Bethsy-i hian Australia bakah hian Malaysia, Singapore, Myanmar (Yangon), America leh Bangladesh te a tlawh tawh.

A zin chanchin kar laka ngaihzawng emaw, pasal emaw chungchang zawhna chu Bethsy-i chuan, "Pathianin rem a tih chuan pasal te chu ka la nei ve em ang chu. Pathian ṭih mi, innghahhna tlak, mahni inring tawk leh inthunun thei hi ka mipa duhzawng chu an ni," a ti. Mizo hmeichhe zinga zaithiam a tih zawhna chu, "Mizote hi zai lamah hma kan sawn nasa hle a, chuvangin a ber sawi tur ka hre lem lo a, an thiam ka ti vek. An thiam dan erawh a inang lo vekin ka hria," tiin a chhang.


Share this Post

Login to comment
No Comments