Billboard Latin Music Award-ah Ozuna a ropui

Kum tina sem ṭhin Billboard Latin Music Award chu nimin zing khan Las Vegas-ah sem a ni leh ta a, Puerto Rican Ozuna chuan award 11 zet a hum haw. Ozuna hi Billboard Latin Music Award his­tory-a ṭum khata award la hnem ber a ni a, a ropui zia hahipin an sawi.

Tun ṭumah hian - Bad Bunny, Daddy Yankee leh Shakira te chu award dawng langsar zingah an tel a, American rapper Cardi B chu Crossover Artist of the Year atan thlan a ni bawk.

Ozuna = 11
'Imposible' singer Ozuna ropuina hmuh hmaih chi rual a ni lo a, record a siam miau avangin history-ah a hming a chuang reng tawh ang. Award 11 a dawn zingah hian Artist of The Year a tel a, hei hian Latin music industry a thunun tih a nemnghet bawk.

Kum 27 mi Ozuna hi award sem a nih hma hauh aṭanga thawm nei lian ber a ni a, category 16 zetah a hming a lang. Chung zinga category 11 zetah chuan winner a ni a, award hlu ber ber a hui kim deuh vek a ni. Artist of The Year bakah hian - Hot Latin Song Artist of the Year, Latin Albums Artist of the Year leh Latin Rhythm Album of the Year te a tel a ni.