Nunui Rualhleng Miss India East-ah sub-title pahnih a la

Femina Miss India 2019 thlanna neih mekah, Nunui Rualhleng chuan Miss India East Zone bikah sub-title pahnih a la. R. Lalnunthari (Nunui) hian Miss Photogenic leh Miss Talented te a la a, June thla-a Femina Miss India grand finale neih turah a inlan zui dawn a ni.

Miss India 2019 thlanna hi Zone pali - North, East, West leh South-ahte ṭhen niin, Zone tinte hi grand finale-ah an intihsiak dawn a ni. East Zone-ah hian state 13 awmin, April 23 zan khan The Westin Kolkata Rajarhat, Kolkata-ah zone final hi neih a ni.

He hunah hian sub-title hrang hrang result puanna leh hlanna neih nghal niin, Nunui Rualhleng hi Miss Photogenic leh Miss Talented te hlan a ni. Nunui hi Miss India Mizoram 2019 a nihna hlan nghal a ni a, Miss India Mizoram 2018 Lily Darnei chuan title hi a hlanchhawng a ni.

'Perfect' girl!
Mizo model zinga hriat hlawh ber te zinga mi Nunui hian modeling lamah sulhnu ṭha tak a lo nei tawh a, Femina Miss India 2019 thlannaah pawh Mizoram ai awh turin thlan a ni.

Mizoram ai a awh zo tih lantirin Miss India East Zone-ah sub-title hlu tak pahnih a hlawhchhuak zui a, state hrang hrang nula zingah a duai bik loh zia a lang. Nunui hian Miss India East Zone final-ah hian Ed Sheraan hla hit 'Perfect' chu track music hmangin a sa a, Miss Talented sub-title a lakpui ta a ni.

Camera hmaah pawh a zam chhe mai lo - state hrang hrang aṭanga nula hmelṭha leh zei ber ber te zingah pawh Miss Photogenic la thei ngat a ni. Nunui Rualhleng chuan, "Sub-title hlu tak pahnih lai ka la thei hi ka lawm tak zet a, min duksaka min puitute zawng zawng chungah lawmthu ka sawi a ni. Mizoram tan theihtawp chhuah zel ka tum a, min thlawp zel turin Mizo mipuite ka ngen a ni," a ti.

Kum tina neih ṭhin Femina Miss India thlanna hi kuminah pawh kalpui leh mek a ni a, Grand Finale neih hun tur pawh tih chian a ni tawh. June 15 khian Mumbai khawpuiah neih a ni dawn a, zone hrang hrang aṭanga finalist te an inlan dawn a ni.