Siampuii Ralte 'Thawnthu Tawp Thei Lo Tur' chu hei le

Jt Production nen thla khat vel liam taah khan 'Hmangaih te' tih hla hmangin Zofate min awi a, mawi kan ti hlawm hle a nih kha.

Sihphir tleirawl Siampuii Ralte chuan a official music video pahnihna a rawn tichhuak leh dawn ta a, Zonet lamah zanin hian kan thlirin kan ngaithla tawh mai thei a, TV kan en hman lo a nih pawhin 'Siampuii Ralte Youtbe channel' lamah a hmeh chhuah theih thuai dawn.

'Thawnthu Tawp Thei Lo Tur' chu...
Siampuii Ralte hla thar hi 'Thawnthu Tawp Thei Lo Tur' tih a ni a, a phuatu chu 'Parmawi' a ni. Khawvel, hringnun dam chhunga inhmangaihna piah lama thih hnu khawvel thlenga len dun beiseina lam hla a ni. Siampuii zai ngainatute tan chuan ngaiven ran chi a ni ang.

He hla hi WoWv Production videographer Anthony WoWv nen a thawnthu kal dan tur vel an sawi dun hnua phuah chhuah a nih thu Siampuii chuan Vanglaini a hrilh a, WoWv Production photographer, songwriter ni bawk Johntea hnenah an duhdante hrilhin ani chuan an beisei phak baka mawiin a rawn phuah chhuak ta a ni.Music leh recording chu H Production kut chhuak a ni thung.

Siampuii'n eng nge a sawi?
"A hla hi inngaihzawnna lam ringawt kâwk thei a ni chuang lo a, hringnuna kan hmangaih em em, kan nu leh pa, unau leh ṭhiante nena kan inhmangaihna lam pawh a kâwk tel vek thei âwm e."He video hlawhtlin theih nana min puitu zawng zawng te, a bik takin RB Impressions, The Bunkers, T2wo Floral Bouquet leh ka producer WoWv Production-te zarah music video ṭha tak ka rawn tichhuak thei tur hi ka lawm em em a ni," tiin a hla thar chungchang leh a lawmthu a sawi.