IFPI Global Album All Format Chart topper BTS 'Map of the Soul: 7'

International Federation of the Phonographic Industry-in a siam thar Global Album All Format Chart 2020-ah Korean super group Bangtan Boys chu pakhatna a ni a, nikum February thlaa an tlangzarh 'Map of the Soul: 7' album chu pakhatna an nihpui.

Khawvel pum huap recorded music industry aiawhtu pawl IFPI chuan khawvela album ṭha zual 10 a tichhuak a, chung zingah chuan BTS 'Map of the Soul: 7' hi an dah chungnung ber a ni. An chart siamah hian BTS album hi pahnih a lang nghe nghe a, tunhnai lawka an tlangzarh 'BE (Deluxe Edition)' pawh kha palinaah a awm a ni.

Nikum February thlaa an studio album palina 'Map of the Soul: 7' tlangzarh a nih khan, an ram mai bakah khawvela music market lian zual panga- USA, Japan, UK, Germany, leh France-ahte chart topper a ni vek a, an ram Korea-ah phei chuan all-time sales record a break hial.

Global Album All Format Chart 2020-ah hian The Weeknd 'After Hours' album chu pahnihna a ni a, Billie Eilish 'WHEN WE ALL FALL ASLEEP, WHERE DO WE GO?' chu pathumna a ni bawk.

BTS band dintu Big Hit Entertainment chuan an company hming chu  HYBE Corporation tiin an thlak dawn niin Variety chuan nimin khan a tarlang.

Big Hit Entertainment hian an hming thar hi Korean company regulatory authority hnuaiah an register fel tawh nia tarlangin, an shareholder-te erawh chuan hming thlakna hi an la pawmpui chiah lo niin an tarlang bawk. Korea stock market regulator-ah pawh hemi chungchang hi puanzar a la ni lo niin Variety chuan a tarlang a, March 30-a general shareholders meeting an neih hunah an puangzar dawn niin an tarlang.