Social media hi a hrisel lo - Selena Gomez

A hmangtu mihring a zir chu a ni teh mauh mai a, amaherawhchu, mi tam takin chin tawk an hriat miau loh avangin Selena Gomez thusawi hi hnial ngawt theih a ni lo. American singer hian social media chu 'unhealthy' tiin a sawi mauh mai a, tun hnaiah social media a sawichhe nasa hle. 

'Wolves' singer Selena Gomez chuan social media a khawih tlem sawt hle a, a chhan pawh depression a siam sak vang tih a sawi. Tun hma deuh chuan social media kaltlangin fan-te nen an inkawm nasa hle tih a sawi a, fakna ringawt a dawn reng bik loh avangin a nunah harsatna tam tak a thlen tih a sawi. 

Twitter leh Instagram kaltlanga sawiselna a dawn hrang hrangte chuan a rilru lamah nghawng a nei a, a tawpah chuan depression hial a hring chhuak ta a ni. Selena chuan, "Social media hi ka khawih nasa em em a, mahse tunah chuan a hrisel loh zia ka hre tawh a ni. A bikin kum lama naupang zawkte tan a him lo a, an hun pum deuh thaw khawral nan an hman ṭhin avangin an nih tur ang an ni pha lo ṭhin a ni," tiin a sawi a, chung zingah chuan amah ngei pawh a tel tih a sawi. 

Kum 26 mi Selena Gomez hi a taksa leh rilru lamah harsatna a tawh avngin hun eng emaw chen chu a talbuai a, music khawvelah pawh a reh tlawk tlawk a ni ber. Tunah erawh ngai a awh leh tawh a, rimawi lam pawh a luhcilh chho leh tawh a ni.