Anya Taylor-Joy-in 'The Queen's Gambit' team a thawhpui leh chak

Nerflix series hit tak 'The Queen's Gambit' chu season 2 siam leh dawn ta se chuan, achangtunu ber Anya Taylor-Joy chuan chan leh a hreh lo thu a sawi tlat mai. Chutiang boruak karah chuan fan ṭhenkhat chuan season 2 siam leh turin film siamtu lam an phut ve mek bawk.

Entertainment Tonight-in an kawmnaah Taylor Joy chuan 'The Queen's Gambit' team pumpui chu a ngaih hlut thu a sawi a, a chhunzawmna siam leh dawn chu nise a thawhpuite nena thawhho leh chu a chak thu a sawi a ni. A thawhpuite chu thawhpui leh theihna 'chance' a nei a nih phawt chuan bawhpelh a tum lo niin a sawi. 

Mi ṭhenkhatin season 2 siam leh an beisei tih a hriat chuan a barakhaih hle tih a sawi bawk. Pathianni zana an sem, Golden Globe Awards 2021-ah pawh khan 'The Queen's Gambit' hi television series che ṭha pawl tak a ni a, Anya Taylor-Joy hian Best Actress - Television Motion Picture award a dawn bawkah 'The Queen's Gambit' hian Best Television Motion Picture award a dawng bawk a ni.