UN Climate Change Conference Goodwill Ambassador tur BLACKPINK

November 1-12-a, Glasgow, Scotland-a United Nations Climate Change Conference vawi 26-naa goodwill ambassador tur chu tudang ni loin K-pop group BLACKPINK an ni dawn.

BLINK tan chuan thu chhiar nuam tak a ni ngei ang. Korea Herald-in an tarlan dan chuan quartet-te hi climate change chungchanga khawvel puma campaign nei tura advocate atan ruat an ni. Blackpink hian British Prime Minister Boris Johnson hnen aṭangin tunhnai khan Goodwill Ambassador tura sawmna lehkha hi an dawng tih tarlangin, "Tunhnaia in video 'Climate Action in Your Area #COP26' kha a hlawhtling hle a, social media platform-ah mi maktaduai 10 chuangin an thlir a ni. Climate change hi tun hunah chuan issue pawimawh ber zinga mi a ni a, chumi a nih avang chuan he issue pawimawh takah hian in aw chhuah tura thlan in ni," tiin sawmna an dawng tih Herald chuan a tarlang.

Blackpink hian nikum kum tawp dawnah khan 'Climate Action in Your Area #COP26'  video an tichhuak a, hetah hian Climate change chungchanga campaign an nei a ni. Thilsiam hrang hrang hlutna te sawi chhuakin chung thilsiamte chu khawvel tana an pawimawhna an sawi hnuah khawvel boruak chhe mek chhanhim tura kan la tlai loh thute an sawi bawk. He video hi 2021 UN Climate Change Conference promote-na a ni a, tunah chuan UN Climate Change Conference Goodwill Ambassador atan ruat an ni ta hial a ni.