Kum 2020 = Japan Manga market hlawk ber kum

All Japan Magazine and Book Publisher's and Editor's Association (AJPEA) chuan Ningani khan nikuma Japan-a manga publishing industry report a tichhuak. Report aṭanga a lan dan chuan nikum chhung khan manga industry chuan yen tluklehdingawn 612.6 ($tld 5.77 vel) a lalut a, kum 2019 khan yen tld 498 vel lalutin nikuma an lakluh hi 23% vel laiin a tam zawk.

AJPEA hian kum 1978 aṭang khan manga industry sum lakluh dan hi an chhut ṭan a, nikum kha an sum lakluh tam ber ṭum a ni. Kum 1995 khan yen tld 586.4 an lo lalut tawh a, kha kha an record awm sa chu niin nikuma an sum lakluh hian a rawn khum ta chiah a ni.

Nikum chhung khan Demon Slayer: Kimetsu no Yaiba chu manga hralh tam ber a ni a, Anime News Network-in a tarlan dan chuan copy 82,345,447 vel an hralh a ni. Kingdom chu pahnihna niin copy 8,251,058 an hralh a, pathumna chu One Piece a ni a, copy 7,709,667 vel an hralh. Nikum chhung khan Demon Slayer: Kimetsu no Yaiba hi an hralh tam fal rem rem hle a, record an siam theihna tur pawhin a thawh hlawk hle.

September 2019-a Statistica data a tarlan a nih dan chuan Mizo ṭhalai tam tak pawhin an buaipui em em Eiichiro Oda manga series ‘One Piece’ chu khawvela manga hralh hnem ber a ni. Data an tarlan thlengin copy maktaduai 454 an hralh tawh.

Dragon Ball chuan dawtin copy mtd 300 chuang an hralh tawh a, pathumna chu Golco 12 a ni a, copy mtd 280 an hralh tawh a ni. Naruto chu palina niin Detective Conan chu pangana a ni bawk. One Piece manga hi tun thla tir thleng khan khawvel ram 43-ah copy mtd 480 hralh a ni tawh a, author pakhatin comic book series a publish hnem ber  'Guinness World Record' pawh a lo siam tawh a ni.