Zanin Zonet-ah MITTUI a chhuak dawn ta

Mizo short film thar 'Mittui' chu zanin hian Zonet-ah en theihin a awm dawn ta.

Rosangpuii, Zorema Khiangte leh Vanlalmawipuia te channa film hi a hmuhnawm ngei ang tih a rinawm a, a changtute an ṭha bawk a, en manhla tur tak a ni. Malsawma Fanai (MSpace) direct niin Zonet Zawlbukah zanin Chanchin Thar zawhah hian a en theih dawn. 

'Mittui' hi Thingtlang Tlangval film-a kan lo hmelhriat tawh Mimi K Lalnunfeli script ziah a ni a, Mizo rilrem tur tak a ni dawn tih a chiang.

Lungdai nula hmangaihnaa a talbuai dan vel a ni dawn a, a ngaihzawng kawplai aia an khaw doctor thar a thlan zawk dan, chu doctor chu nupui fanau nei lai a lo ni si; engtiang takin nge an buai chhoh dawn tih vel chu zaninah hian i sitting room aṭangin i en thei dawn.

He film hi Lungdaia an chan a ni a, lockdown laia hun chep tak kara an chan kha a ni. Rosangpuii hi chu Mizo film hrang hrangah sulhnu ṭha tak tak hnutchhiah tawh a ni a, kan hre fur tawh hlawmin a rinawm. Zorema Khiangte hi chu Grace film-a a changtupa kha niin zaithiam a ni bawk a, Grace OST 'Saltang Ṭawngṭaina' a sak phei chu Mizo fakna hla hit ber pawl a ni mek. 

Director Malsawma hian project dang peihfel thuak tawh pawh an la nei tih Vanglaini a lo hrilh tawh a, chuvang chuan kumin chhung hian film hmuhnawm tak tak min hlui mai thei. 'Mittui' hi zanin dar 8-ah hian Zonet Zawlbuk bakah Zonet HD-ah tihchhuah a ni dawn a, Zonet OTT tv.zonet.in-ah en theihin dah a ni dawn bawk. tv.zonet.in-ah hian Zonet special programme hrang hrang dah a ni a, a duh tan pawisa tlem azawng chawiin a en theih reng a ni.