Lalremruata-a'n music video peihfel

Hla phuah thiam leh zaithiam ni bawk Lal­remruata chuan hun eng emaw chen hla thar a tichhuah loh hnuah, music video thar a rawn peihfel leh ta reng mai. Tun ṭuma a hla hi ‘Tute nge hlim?' tih a ni a, Zonet lamah hmuh tur a awm thuai dawn e. 

'Amen silfai ka ni' tih hla leh 'Zing khua a var dawn ta' tih hla hmanga mipui lo awi tlei tawh ṭhintu Remruata hian a hla thar hi D-11 Production kaltlangin a tichhuak a, MDM library-ah dahluh a ni bawk. YouTube lamah pawh hmuh tur a awm thuai dawn a ni. 

Tun ṭuma a hla thar hi ama phuah niin, TV-ah live-a a sak bak chu hmun dangah a la sa lo a ni. A hla hi a thu a ṭhain ṭhalai lam pawhin an sak duh tur tak a ni. 

Lalremruata hi synod rivival speaker niin hmun hrang hrangah rawng­bawlna neiin a fehchhuak ṭhin a, thu leh hla lamah pawh a duh angin a in­hmang tam thei lo. Heti chunga music video buai­pui a, a tichhuak thei hi a zai ngainatute tan chuan thu lawmawm tak a ni. 

'I tlai ange' singer Lal­rem­ruata hian hla phuah lamah pawh sulhnu ṭha tak a lo hnutchhiah tawh a, Idol, Icon leh zai lama intihsiakna lamah te a hla an sa nasa ṭhin hle a ni.