Hontrade International Ṭhazual Lengzem: A chung berah Kimkima Essy-i'n hma a sawn zel

Hontrade International Ṭhazual Lengzem chart-ah Kimkima nekchhuak thei an la awm lo a, a vawi hnih nan No.1 a hauh. Kimkima hian a hla hit 'I zun ngaih lunglen vangin' tih hla hmangin dinhmun sang ber hi a luah a ni. 

Hetih lai hian Essy chu 'Hringnun' tih hla hmangin parukna aṭangin top 3-ah a inhlangkai a, Rpa Ralte leh G'nie te chuan an dinhmun ngai pahnihna an luah ve leh bawk. 

Kimkima hian 'Sarah I zunzam' tih hla hmangin Ṭhazual chart-ah vawi eng emaw zat No.1 a lo hauh tawh a, 'I zun ngaih lunglen' a tihchhuah hnuah pawh dinhmun sang ber a rawn luah leh nghal chat. He hla hmang hian chart hmasa lamah khan pakhatna a lo luah tawh a, a zawnin No.1 a hauh ta a ni. 

Kimkima hian a dinhmun a sawhnghet zel a, nekchhuah pawh huphurhawm tak a ni. A hla lungkuai tak mai hi mipuiin an la ngaithla kham lo a, tunlai lengzem hla lar ber a ni mek. Tunlai lengzem singer zinga hot ber tih ngam Kimkima tel lo chuan Ṭhazual chart a kim lo a, dinhmun sang ber a luah pawh hi a inhmeh hle. 

Kimkima hian nikum December thla khan 'I zun ngaih lunglen' tih hla hi a tichhuak a, a hit rem rem hle. Nula tlangval bakah naupang aṭanga puitling thengin an sakpui thei a, hei hian a lar zia a tichiang hle a ni.

YouTube lamah  

A tirah a lyrics video chauh tihchhuah a ni a, heti chung hian entu an tam hle. December 13 khan YouTube-ah upload niin, tunah chuan viewer maktaduai thum chuang an awm der tawh. A official music video hi January 17 khan upload a ni ve leh a, hei pawh hi mi nuai nga chuangin an en tawh a ni. Kimkima music video hi William Lalrindika siamsak niin, belhchian a dawn hle. Music track leh recording pawh a fuh hle a ni. 

'Hey' tih leh 'In­chhuang mai lo la' tih hla hmanga Zoram lo dengchhuak tawh a ni a, top 3-ah a hmel kan hmu leh ta pawh hi a mak lo. 

Esther Lalpekhlui hian nikum October thla khan 'Hringnun' tih hla a tichhuak a, tunah chuan Ṭhazual chart-ah top 3 a inhlangkai leh der tawh. Chart hmasa lamah khan parukna niin, hma a sawn chak hle. 

Rpa Ralte ft G'nie hla 'I la hria em' hit zia sawi nawn a ngai lo a, chart-ah pawh an mikhual tawh lo hle. Jojo leh Ticos Darhmingliana-te top 5-ah an inhlangkai a, Dj Lalvenhimi chuan parukna a rawn luah ve leh tawh bawk. 

Mizo Idol star Jonathan Lalengzauva chuan a hla thar 'Ka riang ngei e' tih hla hmangin pasarihna a luah a, Fela Colney, Feli Fanai leh Richard Chawngthu te chu top 10-ah an lang bawk. 

1. Kimkima - I zun ngaih lunglen

2. Rpa Ralte ft G'nie - I la hria em 

3. Essy - Hringnun 

4. Jojo - Tunah zawng 

5. Ticos Dara - Lungmawl Duhsam

6. Dj Lalvenhimi - Ni thar duhawm

7. Jonathan Lalengzauva - Ka riang ngei e

8. Fela Colney - Sensiari 

9. Feli Fanai - Tuman an tluk lo 

10. Richard Chawngthu - Beiseinain