‘DOTA: Dragon’s Blood’ NETFLIX-ah

DOTA khawvel chu game mai ni loin a ena en theih turin chhawp chhuah a ni dawn. Streaming giant Netflix chuan DOTA behchhan hian anime series an tichhuak dawn tih Thawhlehni khan an puang.

Netflix anime thar tur hi DOTA: Dragon’s Blood tih a ni dawn a, March 25 hian khawvel ram hrang hranga en theih turin an tlangzarh dawn a, episode pariat a awm dawn a ni. DOTA fan-te tan inpeih a hun a, video game film adaptation hi fuh tak tak a awm laiin 'flop' pawh a awm nual tawh a, a eng huangah nge hei hi kan dah theih dawn tih chu a entute a zir a ni ang.

X-Men: First Class, Thor leh Black Sails vela sulhnu ṭha tak lo hnutchhiah tawh Ashely Edward Miller chu showrunner a nih dawn bakah executive producer a ni dawn bawk.

"DOTA 2 universe kan ngaihtuah chhuah dan hi fan-te chuan an ngaina hle ang a, an character ngainat tak tak thawnthu ropui leh lungchhiatthlak sia an lan dan tur hi an ngainat kan beisei a ni," tiin Miller chuan a sawi.

DOTA tih hming hi chu Mizo gamer zingah pawh a mikhual lo hle. Defense of the Ancients (DotA) game hi chu  Blizzard Entertainment Warcraft III aṭang khan mi tam tak chuan an khel ṭan fur tawhin a rinawm a, kum 2013-a Valve-in DOTA 2 an rawn tihchhuah hnu phei kha chuan tuipui an tam lehzual hle niin a lang.  

DOTA hero lar tak Dragon Night Davion chu an thlur bing deuh dawn a nih hmel a, khawvel aṭangin scourge nuai bo a tum dawn a ni. DOTA 2 character hrang hrang kan hmuh a beiseiawm a, Eldwurm leh Mirana te pawh an lang dawn niin Deadline chuan a tarlang.