Actress sum lalut hnem ber Scarlett Johansson

Forbes chuan Zirtawpni liam ta khan actress sum lalut tam list an tichhuak leh a, Scarlett Johansson tluk thei an awm lo.

Hmeichhe lemchan thiam zingah Scarlett Johansson chu sum lalut tam ber ni mah se, mipa lam nena khaikhin chuan sum lalut tam pariatna a ni phak chauh thung. Johansson sum lakluh zat hi $maktaduai 56 a ni a, kum hmasa lam aiin a sum lakluh hi $mtd 15.5-in a tam zawk. 

Nikum lama Forbes-in actress sum lalut tam list an tihchhuahah khan Johansson hi pakhatna a lo ni tawh bawk. Kumina a sum lakluh pun chhan hi Avengers: Endgame hlawhtlin vang a ni, a tih thei ang. Modern family actress Sofia Vergara chu sum lalut tam pahnihna a ni a, $mtd 44.1-a lalut. Pathumnaah hian Reese Witherspoon a awm ve bawk a, ani hian $mtd 35 a lalut thung.

Forbes highest-paid actress top 10 list-ah hian Nicole Kidman, Jennifer Aniston, Margot Robbie leh Charlize Theron-te pawh an lang. Nikum lama hmeichhe sum lalut hnem langsar tak tak, kumina langlo an awm nual. Chung zingah chuan Angelina Jolie, Gal Gadot leh Julia Roberts-te pawh an tel a ni.

Actor leh actress khaikhin chuan hmeichhe lam hian mipa an tluk lo hle.  Scarlett Johansson hi a pumpuiah pariatna a ni pha chiah a, mipa sum lalut tam pasarihna Adam Sandler khan $mtd 57 a lalut a, heihi Johansson hian a la pha lo a ni.

Johansson leh Sofia Vergara-te chiah hi a pumpuia top 10-a langpha an ni a, mipa sum lakluh an la pha lo hle tih a lang. Kar liam ta Nilaini khan Forbes hian actor sum lalut hnem list a tichhuak a, Zirtawpni khan actress list hi a tichhuak ve leh a ni.