Kanye West-a'n album tlangzarh tur ṭhulh

Kanye West chuan vawiina 'Jesus is King' album tlangzarh a tum chu a ṭhulh nia sawi a ni. 

A gospel album, Jesus is King album chungchang hi Kanye West hian a sawilang vak ngai lo a, kar hmasaa Wyoming-a Sunday Service-ah erawh a sawilang zauh a ni. Hemi zan hian producer Rick Rubin nen hmuhdun zui an ni bawk. 

Kanye West chuan a album thar tur chungchang hi sawizau vak lo mah se, a nupui Kim Kardashian zawk chuan track 12 a awm tur thu a sawi a. A hla ṭhenkhat chu  "Bap­tized," "God Is," "Selah", "Sunday," leh  "Sweet Jesus" tihte an ni. 

West hian Sunday Service a buatsaih ṭhin chu a buaipui ber a, kumin January thla khan Los Angeles-a a inah he service hi a kalpui ṭan a ni. Sunday Service a buatsaihah hian gospel choir-te nen an perform ṭhin. Mi lar eng emaw zatin a Sunday Service hi an lo chhim tawh bawk a ni. Tunkar Sunday Service concert hi Detroit-ah a nei ang.