Francesca Battistelli-i'n Nau a pai laiin Pathian tihdamna a chang

Contemporary Christian music artist  Francesca Battistelli chuan a rai laia a taksaa harsatna a tawh aṭanga Pathianin a tihdam dan mak tak mai chu a Instagram-ah a tarlang.

Grammy Award pawh pathum lai dawng tawh, Francesca Battistelli chuan a harsatna tawh aṭanga chhanchhuaktu Pathian chu fakin a rai laia a chhula 'cyst' lian tak awmin na nasa tak a thlen ṭhin, Pathianin a lakbosak dan a sawichhuak a ni.

Kum 34 mi, Francesca chuan 'cyst' awm chu serthlum tiat deuh thaw, centimetre 10 lai a nih thu a sawi bawk. Battistelli hian kumtir lam khan a fa pangana tur a pai mek thu a lo sawi tawh a, kar 10 vel nau a pai chauh tihah khan a pasal Matt awm loh hlanin a chhula 'cyst' awm chuan na nasa tak a thlen thu leh nau a pai bawk si avanga doctor-te pawhin an paih ngam loh thu a sawi. 

Nauchhar thiam pawhin 'thilmak' a thleng a nih loh chuan a bo theih loh thu leh naute a  neih hunah chiah paih theih a nih dawn thu a sawi a, mahse Battistelli-te nupa chu nasa taka an ṭawngṭai hnuah mak tak maiin 'cyst' chu a bo ta a ni.

'Free to be me' thiam tak maia satu Battis­telli chuan a natna tawrh lai hian mi tam tak ṭawngṭaipui turin a sawm tih sawiin, inzai an ngam loh avangin Pathianin tihdamna chu an ring tawh tih a sawi. Kar 20 hnua ultrasound an tih leh chuan 'cyst' chu technician-te pawhin an hmu ta lo tih sawiin, Pathian a rinna pawh a chak lehzual sawt thu a sawi bawk.

An fa pangana tur hi mipa a nih thu tarlang bawkin kumtawp lamah hi chuan an neih beisei a ni.