Christian Bale-a'n Robert Pattinson Batman thlawp
Mi tam takin Batman role play tawha la thiam bera an ngaih Christian Bale chuan Twilight star Robert Pattinson 'The Dark Knight' lema a chang tur chu a thlawp thu sawiin, Batman atana ṭha tak tur a nih a ring.
Christopher Nolan-a Batman trilogy-a hnehsawh taka Bruce Wayne lema chang, Christian Bale chuan 2021-a tihchhuah tur Batman film-a Batmobile vel han khalhkual tur atana Robert Pattinson an thlang chu duhthlanna ṭha tak a nih thu a sawi.
Toronto Film Festival-a a channa film thar 'Ford v. Ferrari' tihlarnaa an kawmnaah hemi chungchang an zawhna hi chhangin duhthlanna fuh tak a nih thu leh a ngaihven thu a sawi a ni.
Batman an tam tawh
DC Comics superhero Batman role play thei chin hi chu mi langsar tak tak an ni a, 1960 chho khan Adam West chu Batman hmasa a lo ni tawh a, a larpui viau nghe nghe a nih kha. 1989 khan Michael Keaton pawhin Batman suit hi a lo ha tawh bawk. Val Kilmer leh George Clooney-te pawh Batman lemah an chang tawh a ni.
'Batman v Superman: Dawn of Justice', 'Suicide Squad' leh 'Justice League'-ahte khan Ben Affleck khan sawiselna nasa tak hnuaiah Batman role hi hnehsawh takin a lo play tawh bawk.
Tunah Robert Pattinson a chang leh tur hian titi a titam hle. Christian Bale khan a role kha a hnehsawh em avang khan amah thlaktu Ben Affleck nen khaikhin a hlawh a, tunah Pattinson-a'n a chang leh dawn a ni a, Batman fan-te tam takin an beisei ang Batman an hmu dawn em tih chu hriat a chakawm tawh hle ang.