Jennifer Aniston-i'n instagram record siam
American actress 'Friends' serial movie atanga kan hriat lar Jennifer Aniston chuan instagram account chu siam ve ta a, khawvela follower maktaduai nei rang ber record a siam nghal.
Instagram account thar a siam aṭanga dar kar 5 leh minute 16-naah follower maktaduai a nei hman der a ni. A hmaa record lo siam tawhtu Prince Harry leh Meghan Markle-te chu minute 29-in a khum thu USA today chuan a tarlang.
October 15 khan Friends-a a chanpui ṭhenkhat- Courteney Cox, Lisa Kudrow, Matt LeBlanc, Matthew Perry leh David Schwimmer-te nena an thalak hona, a caption-a 'And now we're Instagram FRIENDS too' tih a hman chu a account thar ah hian a post a, hei hian like tu maktaduai 11 a nei tling hma hle bawk.
A record siam hi Guiness World Record chuan a chhinchhiah a ni. Jennifer Aniston hian nimin thleng khan follower maktaduai 11.2 chuang a nei tawh a, mi 121 follow back tawhin, post pahnih lek a la siam thung.
Chhinchhiah tlak
Jennifer Aniston hian duhtu a lo ngah hle a niang, IG lamah account thar a siam tih mipuiin an hriat hnu lawk khan follower request a ngah leh lutuk a, rei lote chhung chu application a crash hial!
People's Icon award dawng dawn
Friends star hnenah hian 2019 E! People's Choice Awards-ah People's Icon award hlan a ni dawn. November 10-a sem tur E! People's Choice Awards-ah he chawimawina hi hlan a ni dawn a, a hmain People's Choice Awards hi pasarih a lo dawng tawh bawk.
E! News, Live Events and Lifestyle Digital, General Manager Jen Neal chuan Jennifer Aniston chu 'tour de force' tia sawiin, tunlai khawvela character chhinchhiah tlak tak tak, ngaihsanawm leh theihnghilh theih loh tur, inngaihbel theih tak tak changchhuaktu a ni, a ti. Comedy lam leh drama lam thleng pawhin, film lian leh lian lohahte pawh hneh taka chang ṭhin a ni a, hemi avang hian The People's Icon of 2019 hi kan hlan dawn a ni, a ti bawk.