BCM Serkawn Pastor Bial Zaipawl Music Video album tichhuak
BCM Headquarters awmna hmun, Serkawn Pastor Bial Zaipawl, 2017-2019-te chuan 'A hnai reng ṭhin' music video album, hla 12 awmna chu Ningani zan khan an tlangzarh.
'A hnai reng ṭhin' album-a music video-te hi MDM Library-ah dah luh nghal a ni a, YouTube lamah pawh hmuh tur a awm thuai ang. He album-a hlate hi hla ṭha tak tak, Mizo ril rem zawng tak, hla thar leh hla lar sa, Kristian hla bu ami te an ni hlawm.
Album title hla 'A hnai reng ṭhin' hi Upa B. Sangmawia hla a ni a, ṭhalai nun beidawng leh depression nei ṭhin tan te, fate avanga rilru hah leh rum ṭhin tan phei chuan ngaihthlak ngei ngei tur chi a ni ang. An conductor HC. Lalrinliana hla phuahte pawh he albumah hian dahtel niin, tunlai Pathian hla ṭha tak tak phuah ṭhintu Upa C. Lalzarmawia kutchhuak pawh dahtel a ni bawk.
Video hoah hian BCM hmun pawimawh thenkhatte hmuh tur a awm a, a tam zawk chu hmun khata live show ang deuha uluk taka shoot-te a ni. Video hi sulhnu nei ṭha tak Mspace kutchhuak a ni a, Music track-te hi Lal K Sailo, Duata Fanai Zarep, Hminga, Larry, leh Naashvik tracks-te kutchhuak a ni bawk. Recording hi Studio A16 kutchhuak niin, hla pahnih erawh an conductor record a ni thung.