Trump-a policy ṭhenkhat a sut nghal
US president Joe Biden chuan a office a luah hnu lawkah hmalakna tur 15 a sign nghal a, office a luah hma chiahah office luahtu Republican Donald Trump hmalakna ṭhenkhat chu a sut nghal a ni.
Oval Office-ah thuthar thehdarhtute hmuh lai ngeiin an ram huna Nilaini tlaiah khan Biden chuan heng a hmalakna tharah hian hming a ziah hnan nghal a, hun khawhral hman an nih loh thu a sawi bawk. "Vawiina executive action ka ziah ṭhenkhat hian Covid buaina hmachhawnna turah kawng min thlaksak dawn a, hma kan la lak ngai lohna angin climate change kan do dawn a, racial equity-ah hma kan sawn dawn bakah underserved community-te kan thlawp dawn bawk. Heng hi a bulṭanna chiah a ni," a ti.
Executive action a ziah zingah hian Paris climate accord-a luh leh dan tur te, climate change do dan tur chungchang leh ramria indaidanna bang siam fund sut dan tur chungchangte a tel a, Muslim ram ṭhenkhat aṭanga US-a luh khapna sutna dante pawh a tel.
Biden-a press secretary Jen Psaki chuan executive action dang pawh puan a la ni lehzel dawn tih sawiin, nihna thlak (transgender)-te military service-a an luh khapna dante pawh sut a la nih dawn bakah nau tihtlak kaihhnawiha ram danga US-in pawisa a pek ṭhin danna policy-te pawh sut a la ni dawn.