Youth Icon Top 10-ah mi 11 tling

EverHome Youth Icon 2026 intihsiakna chu a hmawr bawk lam hnaih zelin, Top 10 result chu Ningani zan khan puan a ni a, 'Ticket to Arena' hmanga hlankai nen Top 10-ah mi 11 an tling. Top 10 intihsiakna hi November ni 23, 2026 zan aṭangin LPS Arena, Falkland-ah neih ṭan a ni dawn a; mipui tan chhim theih a ni tawh ang.

Third Round intihsiakna hi November 17-18 chhung khan neih niin mi 27 an intihsiak a, an zing aṭangin a thiam zual mi 10 thlan chhuah an ni ta a ni. Mi 10 bakah Second Round intihsiakna neiha Judge ten 'Ticket to Arena' an pek, Andrew Lallawmzuala, Falkland nen mi 11 in intihsiakna an hmachhawn leh dawn a ni.

Top 10 te hian mentor an nei dawn a, mentor pali an awm ang. Nimin khan mentor-te hian contestant an kaihhruai tur te an pawt nghal bawk.

Youth Icon Top 10 intihsiakna zan hmasa ber hi ticket ngai loin a thlawnin mipui tan a chhim theih dawn a, zan dar 8-ah ṭanin, LPS 1-ah Live in pek chhuah a nih bakah LPS YouTube Channel-ah member tan a en theih dawn a ni. Top 10 result hi November ni 24, Thawhlehni zanah puangin mi pahnih an tla dawn a, a tlingten hemi zan vek hian intihsiakna an chhunzawm nghal ang.