
Shillong Cherry Blossom Fest ṭan dawn; Artist inlan tur an hrawl
India rama sakhua leh hnam bil kut ni lo zinga kut ngaihven hlawh pawl ni chho mek, 'Cherry Blossom Festival' chu zanin aṭangin ṭan a ni dawn. Fest hi kum 2016 aṭang khan Meghalaya khawpui Shillong-ah neih ṭan a ni a kum 10-na a tling ta. Nimin khan International Music Summit hmangin kut hi hawn a ni a, zanin leh naktuk November 20-21 zanah global artist hrawl tak takte nen hun hman a ni ang.
Cherry Blossom kut hi Madan Kurkalang, Bhoirymbong-ah hman a ni dawn a, zanin hian American rapper, singer, leh actor Nelly a inlan dawn. Ani bakah American pop-punk rock band, an hla pawh Zoram dung leh vang thlenga kan lo sakpui ve theih, Boys Like Girls an perform dawn a, UK lam DJ ALTÉGO leh Indian Singer Darshan Raval-te chetla hmuh tur a awm dawn bawk.
Naktuk zanah American singer leh rapper Khalid leh Swae Lee -te bakah English singer Elliot James Rey leh Swedish electronic music project Galantis-te an inlan bawk ang. Hmarchhak state, a bikin Meghalaya leh Assam ten music festival lian buatsaih a, global artist hip luhna turin Concert Tourism policy an kalpui a, khawvel huap artist larte an chah chhuak fo tawh. Mizoramah pawh hetiang hi an la tih ve theih thuai a rinawm.