Hranghlui zaithiam leh hlaphuah thiam Vanlalruata Zote a her liam ta

Mizo hranghlui zaithiam leh hla phuah thiam, Vanlalruata Zote (Ruata Zote) chu kum 69 mi niin Thawhlehni khan cancer natna vangin Nazareth Hospital, Chaltlangah a thi. Nizanah an chenna inah lumen niin, vawiin chhun dar 12-ah Ramhlun North Presbyterian Kohhran Primary Department Hall-ah vui a ni ang.

Ruata Zote hian hla tam tak a phuah a, hla lar tak tak pawh phuahin 'Pari Zun' tih phei chu Zoram dung leh vang dengchhuak thei a ni. Tun thleng pawha sak hlawh tak a la ni. 'Pari Zun' hi Vanlalruati'n a sa lar hmasa a, a hnuah zaithiam dang Mimi Lalzamliani, Michael M. Sailo leh Lalenkawli Pautu te sak pawh a lar zui leh hle bawk. Amah pawhin Ruata Zote Ft. NGO - "Pari Zun" music video-ah a sa bawk. Hei bakah a ṭhianpa tana a phuahsak, 'Ti lo teh ang' tih pawh tun thlengin a la lar a ni. Zai a ngaina a, band/group hrang hrang - Sweet Combination, Harvest Ministry, Zai Ngaina Pawl (ZNgP), Forever Young leh Never Grow Old (NGO) ahte a tel bakah Ramhlun North Music Society pawh a hoin din a ni.

Ruata Zote hian a nupui, Lalrinsangi Fanai leh a fate pali a kalsan a, nikum khan a fapa upa ber a thi tawh bawk a ni.