Billboard 200: Kum 20 hnuah No 1-ah My Chemical Romance album

American rock band, My Chemical Romance in kum 2006-a an tihchhuah, "The Black Parade" album kum 20 tlin puala track thar paruk dah belha deluxe an tihchhuah thar leh chu Billboard 200 album chart-ah No.139-na aṭangin No.1-ah a kaisang dawrh mai. Kum 2006-a tihchhuah a nih khan album chart-ah pahnihna dinhmun chu a thlen san ber a ni a, mah se kum 20 hnuah No.1 ah a rawn lang thei ta a ni.

Emo classic band hian kum 20 puala track paruk an dahbelh zingah hian "Someone Out There Loves You" chu focus track niin, hla dahbelh zinga fan-te duhber a ni bawk. MCR 'The Black Parade' hian album reissue hmang hian equivalent album unit 78,000 a nei tling.

MCR album 'The Black Parade' hi kumin chhunga album chart-a top spot a rawn kir leh tura kum 10 aia rei nghak album pathumna niin, kumin vek hian Jhene Aiko chu No.1-ah rawn lang tharin, Megadeth pawhin February khan 1986 a album an tihchhuah tawh chu No.1-ah an rawn kir pui ve bawk.

Olivia Rodrigo 'you seem pretty sad for a girl so in love' chuan album unit 64,000 neiin pahnihnaah a awm a, Morgan Wallen pawh 'I'm the Problem' hmanga album unit 53,000 neih belhin a insawh nghet zui zel. Ella Langley 'Dandelion' leh Noah Kahan 'The Great Divide' pawh Top 5 ah an la lang.