Ni thum awh tur Mizoram Tribal Film Festival 2026 ṭan

Ministry of Tribal Affairs bultuma duan, Art & Culture Department leh Information, Public Relations, Printing & Stationery Department ṭangkawpin an buatsaih, ni thum awh tur Mizoram Tribal Film Festival 2026 chu nimin khan Vanapa Hall-ah ṭan a ni.

Mizoram Tribal Film Festival hi Art & Culture minister C. Lalsawivunga'n a hawng a, Reels leh Short Film Making Competition-a lawmman dawngtute hnenah lawmman sem nghal a ni. Short Film Making Competition-ah “Sadawt” film chuan lawmman pakhatna a dawng a, Reels Making Competition-ah 'Maurawkela' in lawmman pakhatna a dawng bawk.

Khuallian chuan Film Festival chu Mizo hnam ziarang pho chhuahna hun pawimawh tak a nih thu sawiin film maker-te chu Mizo hnam chawinungtu pawimawh takte an nih thu a sawi. Mizo hnam leh Mizo Film industry chawinunna kawnga thawk chhuak, film maker-te chungah lawmthu a sawi. Film Festival hawnna inkhawm hi sorkar official hrang hrangten an hmanpui a ni.

Mizoram Tribal Film Festival 2026 neih chhung hian Vanapa Hall leh Lianchhiari Run Mini Theatre-ah Mizo movie hrang hrang en tur a awm dawn a ni. Festival tawp ni, November ni 6 chawhnuah Tribal Research Institute, Kelsih-ah Film Making Competition-a pakhatna, 'Sadawt' chhuah a ni ang.