Shillong Cherry Blossom Festival hmain music summit nei dawn; Festival headliner-ah Khalid, Nelly leh Swae Lee tel

Shillong Cherry Blossom Festival chu November 20 leh 21 hian neih a ni dawn a, festival ṭan hma November 19 hian International Music Summit buatsaih a ni dawn bawk. Summit hi India International Music Week thawhpuinaa buatsaih tur a ni a; festival promoter, recording label, booking agent-te leh khawvel hmun hrang hranga music industry professional-te an tel dawn a ni.

Programme-ah hian Meghalaya Grassroots Music Project (MGMP)-te nen panel discussion, workshop leh inbiak honate neih a ni dawn a ni. He programme hmang hian state puma musician-te leh artist-te chuan international industry professional-te nena inbiak theihna hun remchang a siamsak dawn a ni. Kumin festival thupui atan 'Year of Generations' tih hman a ni a, Cherry Blossom FIT CHECK, fashion leh self-expression inelnate neih a ni dawn a, lawmman hi Rs nuai 20 a ni. Red Bull Fab Zone, mixed martial arts (MMA), arm wrestling, cosplay leh lifestyle activity hrang hrang a awm dawn tih an puang bawk.

Kumin Cherry Blossom Festival-a headliner tur zingah American artist Nelly, Khalid leh rapper Swae Lee bakah pop-rock band Boys Like Girls-te an tel. Festival hi Madan Kurkalang, Bhoirymbong, Meghalaya-ah neih a ni dawn a, a ni khatnaah millenial leh Y2K music lam thlurbingin,a ni hnihnaah Gen Z leh contemporary music lamah focus a ni thung ang.