India-ah Free Fire khelh theih a ni leh ta

India sorkar leh China sorkar inkara innghirnghona a awm chhoh mup mup avanga India sorkarin kum li chuang khelh theih loh tura a lo 'ban' tawh, Free Fire chu game developer Garena chuan India-a khelh theih turin a rawn chhawp chhuak leh ta. Garena hian khelh theihin an rawn chhawp chhuak mai a ni lo a, localized version an rawn tichhuak nghal a ni.

Garena hian kar liam ta Nilaini khan localized version hi tichhuakin, a hming atan Free Fire India tih an vuah a, Android leh iOS a khelh theih a ni. Version tharah hian India ram chhunga hman tur bik thil angte dah tel niin, parental control, playtime limit, leh khawih theih hun chhung angte bakah game data zawng zawng chu India server-ah dah vek a ni tawh bawk.

Free Fire hi kum 2022-a India-in China nena inzawmna nei game 53 a 'ban' zingah khan a tel a ni. Free Fire franchise hian kumin June thleng khan India huam chhungah active user maktaduai 77.4 a nei tling a, BGMI hian maktaduai 20.8 chiah a nei thung niin Sensor Tower chuan an tarlang.