Zaninah Zonet Arkaiden Zan: HC Sanglura pual

Zonet buatsaih 'Arkaiden Zan' chu zanin hian Zo Hall, Chaltlangah hman a ni leh dawn. Zaithiam hrang hrangten kum 2000 bawr chhoa Lengzem leh Fakna hla mawi tak tak an sakte lo phuah chhuaktu, HC. Sanglura Hlate tih hmangin hun hman a ni dawn a, amah Sanglura pawh he hun hmanpui tur hian Champhai aṭangin a rawn chhuk a ni.

HC Sanglura hian hla hit leh mawi tak tak eng emaw zat a phuah a, ama sak bakah mi dangte pawhin an lo sa lar tawh a, hla hi 100 bawr a phuah tling tawh a ni. A hla zinga mi, 'Fuh chiang lo maw' leh 'Teuh lo mai' tih phei chu tun thlengin an la lar em em em a, Daduhi sak 'Min dem lo la' leh 'A va mak em' te pawh ngaihthlak hlawh tak an la ni reng bawk.

Zanina hun hmanah hian Mizo Idol Season 8 Top 5-te an inlan ang. Mizo Idol 2025 Emmanuel Lalremruata hoin Vanlalneihpuii, Zomuansanga, Lalṭhakima, Laldinsanga leh Remlalvuani te bakah, Francis Kawlni ten Sanglura hlate an rawn sa dawn. Zai turte an thiam tih kan hre chiang sa, mit leh beng a tlai dawn a, host Rinpuii kaihhruaina hnuaiah hun hlimawm tak kan hmang thei dawn e.

HC Sanglura hla sak tur zingah hian Rohlu ka nei, Teuh lo mai, Min dem lo la, A va mak em, Min bawihte rawh, Fuh chiang lo maw leh Vala lu a hai tihte pawh an tel. Hun hman hi Zonet Zawlbuk leh Zonet YouTube channel-ah live a pek chhuah a ni ang.