Zaninah Hnahsin Kût kharna Mualnuam Concert: Rebecca Saimawii hoin hun hmang dawn

Champhaia Hnahsin Kût hman mek chu zanin Zirtawpni zan hian Mualnuam concert ropui tak hmanga khar a ni dawn ta. Zaithiam chuai thei lo, Rebecca Saimawii hoin Mizo artist ṭhate an che dawn a, mit leh beng a tlai dawn.

Mualnuam concert neih turah hian Rebecca Saimawii bakah David Darlong, Kimkima, Lil Zo, Shai Hills, Sangtei Khuptong, Aengi & Rosalind-te an perform dawn a, saxophonist pawh a awm bawk dawn. Host tur hi Zorini niin, zan dar 7 aṭanga ṭanin dar 10:30 ah zawh fel hman tum a ni. Zanin programme-ah hian Active Sound hman a ni dawn a, Mark Events an thawhpui bawk a ni.

Nizan khan Hnahsin Kût programme-a lawm hlawh, fashion show, Escape Engmoia Runway neih niin, model eng emaw zat an inlan a, an zingah hian Miss Grand India 2nd Runners up Tanvi Raksam Marak pawh a tel. Mizo model lar zingah Kimkimi, Nunui, Thanthani, Suzanne, Margaret, Teressa, Agnes leh Rimenhawihi te pawh an inlan. Model-te walk karah Rebecca Saimawii, Bengjamin Sum, Zaii Hauchhum, Ms-i Fanai, Jacob Vangchhia, Alex Hauhulh leh DJ Tiny-te chuan performance hmuhnawm leh beng titlai tak an nei bawk.

Hnahsin Kût hi kum 2024 aṭanga Champhai phaizawlah hman ṭan a ni a, Mizorama kut ngaihven hlawh berte zingah a tel tawh a ni. Kumin hian October 6-16 chhungin kut hi hman a ni a, kut hman chhung hian Music Concert, EDM Night, Runway Show, Dance Fusion, Cosplay bakah Heritage Tour, Traditional Show, Paragliding, Kiting leh Angling-te buatsaih a ni. Hnahsin Kut hmanna main venue, Zotlang field-ah hian Exhibition stall leh Food Stall ṭhahnem tak a awm a, Kids Playhouse siam a ni a ni. Kût chhimtu pawh ramchhung bakah ram pawn lam aṭangi pawhin an ṭhahnem thei hle.