Yamaha Teens Rock 2026 winner Neuhof School band-in Aizawl rawn thleng

Khawvel huapa rimawi hmanrua leh motorcycle siamtu company lian, Yamaha Music India Pvt Ltd leh Trinity College London thawk dunin an buatsaih 'Yamaha Teen Rock 2026' chu October 4 Pathianni khan Bengaluru-a Prestige Centre for Performing Arts hmunah a hmawr bawk a ni a, Mizoram school Neuhof School Band chu rimawi tum leh zai thiam ber, winner an ni. Neuhof band hian nimin Thawhṭanni khan Bangaluru aṭangin champion title nen Aizawl an rawn thleng.

Teens Rock 2026 a tel tur hian India ram chhung hmun hrang hrang aṭangin mi 680 in registration an tih bakah video submit band 270 an awm. Inelnaa telte hi zirlai naupang leh music academy band te an ni hlawm. Band heti zat tel zingah Mizoram chhul chhuak school leh Mizo zirlai naupangten dinhmun ropui tak an chang thei a, hei hi rimawi huanga Mizote kan duai loh zia tilangtu ṭha tak a ni.

Neuhof School band member-te hi High School zirlai vek niin kum 13-15 inkarte an ni. Neuhof school naupangte hi an zirtirtuten an thlawp ṭha hle a, tun dinhmun an thlen theihna tur hian hun rei tak aṭang khan an school hian rimawi kaihhnawih program hrang hrang zirlaite tan hian an lo buatsaihsak fo tawh ṭhin.

Zirlai inelna hmachhawnte hi school principal Andrew Lalremkima Pachuau bakah, Music teacher Lallawmzuala leh Ramengmawi ten a hmunah an telpui a ni.