Siampuii Ralte MV thar zaninah chhuak dawn

Mizo hmeichhe lengzem artist zinga boruak nei lian leh performance nei ṭha, Siampuii Ralte chuan a fan-te tan beng leh mit titlai nawn leh turin zanin hian a hla thar 'Eng nge ka hlawkna' tih music video a tichhuak dawn ta. Siampui zai ngainatute tan chuan hmaih phal chi a ni hauh lo ang le!

'Eng nge ka hlawkna' tih hla hi tunlai Zoram rimawi huanga hla mawi tak tak nei thei, Nanaua Hmar phuah niin, a hla kalhmang aṭang hian Nanaua thu leh hla remkhawm thiam zia kan hmu nawn leh. Siampuii Ralte zai mawi tak nen a in chawih hle dawn tih hai rual a ni lo.

Music video hmuhnawm leh cial tak mai hi Green Rocket TV kutchhuak niin, recording erawh Smiley Records kutchhuak a ni thung. Music video tihmuhnawm zual tur hian Mizo Dance Camp dancer bawn tak tak in thehṭhil kan hmu dawn bawk. Music video thar chungchangah hian Siampuii chuan,"Green Rocket TV- te nen kan thawh hona a ṭhat em em bakah kan inlungrual a, theihtawp kan chhuah tlang a ni.MV shoot tur hian thla khat dawn kan inbuatsaih bakah hmun eng emaw zatah kan shoot a, scene hrang hrang pawh a tam ang" tiin Vanglaini a hrilh a, a MV thar hi lo thlirsak ṭheuh turin mipui a sawm.